MK kvartettinn saman á ný eftir 25 ár

Ólíkar dægurlagaperlur, oft í djassaðri útsetningu og með flókinni raddsetningu, verða á söngskrá MK kvartettsins, sem eftir 25 ára hlé stígur á svið í Salnum í Kópavogi nk. miðvikudagskvöld.

 „Við tökum örugglega I love coffie, I love tea, sem fylgt hefur okkur lengst og sönghópurinn Manhattan Transfer gerði frægt á sínum tíma,“ segir Hrafnhildur Halldórsdóttir.

Nemendur og kórfélagar í Menntaskólanum í Kópavogi stofnuðu MK kvartettinn 1981 og komu fyrst fram á skólaskemmtun í félagsheimili bæjarins. Auk Hrafnhildar skipuðu kvartettinn Guðrún Gunnarsdóttir, Skarphéðinn Þór Hjartarson og Þór H. Ásgeirsson, en Þuríður Jónsdóttir kom inn seinna.

„Í rauninni skiptust alltaf fimm á að vera fjórir, því liðsmenn fóru sitt á hvað tímabundið til annarra verka eða útlanda eftir menntaskóla. Núna verður MK kvartettinn skipaður okkur fimm,“ upplýsir Hrafnhildur. Undanfarið hafa þau æft stíft fyrir tónleikana og rifjað upp gamla takta. „Eftir skólaskemmtunina forðum söng kvartettinn fyrst í stað á skemmtunum í Kópavogi en var síðan víða á ferðinni fram eftir níunda áratugnum,“ segir Hrafnhildur.