Tónlist sem hreyfir við iðrunum

Hljómsveitin Plastic Gods hefur verið starfandi í næstum áratug og er þekkt fyrir að spila drunga- og stónerarokk með eigin blæ. Hljómsveitin hefur verið að vinna í óhefðbundnu setti fyrir tónleika á Húrra næstkomandi föstudag. Þá mun sveitin spila drunu- og hávaðatónlist með áhrifum frá raftónlist. Ásamt þeim koma fram tónlistarmennirnir AMFJ, Ultraorthodox og Döpur, betur þekktur sem Krummi í Mínus.

En hvað er svona aðlaðandi við hávaða? „Við erum vön því að heyra umhverfishljóð þegar við löbbum út um dyrnar heima hjá okkur og það eru verksmiðjur í gangi, strætóar keyrandi fram hjá, fólk að tala. Hávaði er alls staðar og ég held að það sé búið að síast í undirmeðvitundina hjá fólki. Þegar það kemst að því að þetta er inni í manni þá dregur það fólk að þessari tónlistarstefnu, ef við ætlum að fara í þetta vísindalega,“ segir Krummi.

„Sumir eru rosalega mikið fyrir háværa tónlist sem hreyfir við iðrunum og gefur þeim nett adrenalínkikk. Síðan getur það líka haft róandi áhrif, eins og þegar menn búa við umferðargötu og bílahávaðinn byrjar að svæfa þig á kvöldin þegar þú venst honum. Síðan er þetta einstaklingsbundið líka. Það eru margir málmhausar sem eru fyrir drunutónlist, það er oft mjög dimmt og ógnvænlegt andrúmsloft í tónlistinni. Í hávaðatónlist eru alls konar súbkúltúrar sem stangast á á skemmtilegan hátt.“

Tónleikarnir á föstudaginn hefjast klukkan 22.00 og kostar litlar 1.000 krónur inn.

Hvað er „noise“ tónlist?

„Noise“ eða hávaðatónlist einkennist af notkun á hávaða í músíkölsku samhengi. Stefnan á uppruna sinn í módernisma en ítalski fútúristinn Luigi Russolo skrifaði stefnuritið The Art of Noises árið 1913 þar sem hann hélt því fram að iðnaðarbyltingin hefði hjálpað nútímamanninum að kunna að meta flóknari hljóð. Taldi hann að hefðbundin tónlist væri heftandi og að hávaðatónlist myndi taka stað hennar í framtíðinni. 



Hávaðatónlist hélt áfram að þróast í gegnum tuttugustu öldina og hefur alltaf haldist í hendur við þróun tilraunakenndrar tónlistar á öldinni. Frægir einstaklingar sem spila hávaðatónlist eða hafa notast við hávaða í verkum sínum eru til dæmis John Cage, Karlheinz Stockhausen, Lou Reed, Sonic Youth, Ryoji Ikeda, Merzbow, Psychic TV og margir fleiri.