Vilt þú vera boðberi hreyfingar?

Hver er þín uppáhaldshreyfing? Talið er að um 600.000 þúsund dauðsfalla í Evrópu megi rekja beint til hreyfingarleysis. Flestir sem hreyfa sig ekki segja ástæðuna vera peningaskort. Það er margt hægt að gera til að bæta lífsgæði sem hvorki kostar krónu né fyrirhöfn. Mestu máli skiptir að hafa gaman af hreyfingunni sinni því það eykur líkurnar á því að maður viðhaldi heilbrigðum lífsstíl.

Það eru skilaboðin í samfélaginu og boðskapurinn sem skiptir máli. Frá því að við vöknum á morgnana og förum að sofa á kvöldin þá erum við að hreyfa okkur og öll hreyfing telur. Hins vegar þurfum við að fá hjartað til að pumpa duglega að minnsta kosti í 30 mínútur á dag til að endurnýja frumurnar okkar og þannig bæta heilsuna – helst 60 mínútur á dag. Alltof margir velja kyrrsetulífsstíl í stað þess að uppfylla ráðlagðan dagskammt. Við pössum okkur að hafa símann okkar vel hlaðinn til að hann nýtist yfir daginn en hvað með líkamann okkar – hans hleðsla er hreyfing, holl næring og góður svefn.

Hvernig fáum við fleiri til að hreyfa sig? Alls staðar í heiminum er reynt að finna töfralausnina og það á einnig við um Hreyfivikuna, Move Week, sem fer fram um gjörvalla Evrópu dagana 29. september til 5. október 2014 – en bara aðeins öðru vísi!

Hreyfivikan Move Week er herferð International Sport and Culture Association (ISCA) sem hefur það að markmiði að kynna kosti þess að hreyfa sig reglulega. Ungmennafélag Íslands (UMFÍ) er aðili að ISCA og tekur þátt í verkefnum samtakanna.

Framtíðarsýn herferðarinnar er „að 100 milljónir fleiri Evrópubúa verði orðnir virkir í hreyfingu og/eða íþróttum fyrir árið 2020“. Það sem er öðru vísi við þessa herferð er að hún er ekki sniðin að ákveðinni íþrótt eða hreyfingu. Allir geta klæðskerasniðið sína Hreyfiviku og nýtt til þess þá kosti sem samfélag þeirra býr yfir til að smita frá sér jákvæðri nálgun á hreyfingu.

Sambandsaðilar UMFÍ, sveitarfélög, einstaklingar og fyrirtæki um allt land, taka þátt í Hreyfivikunni. Fjöldi viðburða og tækifæra verður um allt land til að kynna sér fjölbreytta hreyfingu. Því er um að gera að fylgjast með á http://www.iceland.moveweek.eu/. UMFÍ hefur fengið til liðs við sig Trópí og Nettó sem munu hvetja almenning í Hreyfivikunni og hafa appelsínugular heilsuvörur á tilboði í lit herferðarinnar.

Vilt þú vera boðberi hreyfingar? Skráðu þig sem boðbera á heimasíðunni og bjóddu upp á viðburð, því saman getum við gert frábæra hluti. Áfram við, öll!