"Ég hef beðist afsökunar margoft“

Leikarinn Mel Gibson er á alþjóðlegu kvikmyndahatíðinni Karlovy Vary í Tékklandi til að taka við Crystal Globe-verðlaununum fyrir ævistarf sitt í kvikmyndabransanum.

Blaðamaður Hollywood Reporter greip tækifærið og spurði hann í atvikið sem átti sér stað árið 2006 þegar hann hreytti andgyðinglegum athugasemdum í lögreglumann sem handtók hann fyrir ölvunarakstur en leikarinn Gary Oldman varði gjörðir Mels fyrir stuttu.

„Þetta er að baki; þetta er átta ára gömul saga. Þetta kemur alltaf upp reglulega en ég er búinn að vinna í þessu á ábyrgan hátt,“ segir Mel.

„Ég hef beðist afsökunar margoft. Ég hef gert það sem ég þurfti að gera,“ bætir Mel við. Þá talaði hann líka um hvað væri framundan hjá sér í kvikmyndabransanum.

„Ég var að klára mynd í Nýja-Mexíkó sem heitir Blood Father og er leikstýrt af Jean-Francois Richet. Yndislegur og góður, franskur leikstjóri. Ég leik mótorhjólagaur sem á dóttur sem er í vandræðum.“