Sigruðu fatahönnunarkeppni H&M og Elle í Stokkhólmi

„Þetta er samfestingur með dassi af sjöunda áratugs glamúr sem við reyndum svo að draga inn í nútímann með því að blanda inn hreinum geometrískum línum með áhrifum frá svokallaðri teiplist og franska listamanninum Felice Varini. Karekter Michelle Pfeiffers í „Scarface“ bíómyndinni veitti okkur einnig innblástur,” segir Steinunn Björg Hrólfsdóttir fatahönnuður.

Hún starfar ásamt Gígju Isis Guðjónsdóttur í hönnunardeild Hennes og Mauritz í Stokkhólmi.

Í síðustu viku stóðu vinkonurnar uppi sem sigurvegarar í innanhúskeppni sem H&M efnir til árlega í samtarfi við Elle tímaritið en keppnin snýst um að hanna kjól á kynni Elle Gala kvöldsins.

„Elle Gala er haldin árlega hér í Stokkhólmi og er einskonar uppskeruhátíð tískubransans í Svíþjóð en þar eru þeir sem þykja hafa skarað fram úr á árinu verðlaunaðir. Kjóllinn sem við hönnuðum var svo saumaður upp í stúdíóinu hjá H&M og Josephine Bornebush kynnir Elle gala bar hann hluta kvöldsins. Allir hönnuðir hjá H&M eru hvattir til að taka þátt og þetta er fyrst og fremst skemmtilegt tækifæri. Okkur fannst við hafa eitthvað til málanna að leggja svo við ákváðum að slá til,“ segir Gígja Isis Guðjónsdóttir.

Stöllurnar útskrifuðust báðar af fatahönnunarbraut Listaháskóla Íslands og fengu báðar vinnu hjá sænska tískurisanum Hennes og Mauritz. Gígja Isis var boðið starf hjá H&M eftir að hún sýndi útskriftarlínu sína á Copenhagen Nest á tískuvikunni í Kaupmannahöfn og Steinunni bauðst starf stuttu síðar.

Þegar talið berst að samvinnu þeirra þá segir Steinunn, „Þegar við fórum svo að kasta á milli hugmyndum kom í ljós að það var mikill samhljómur með þeim svo við tókum slaginn saman. Það er miklu skemmtilegra að vinna verkefni með öðrum, þá nær maður oft að koma hugmyndum á næsta plan. Það er líka eitthvað sem við höfum tileinkað okkur hér hjá H&M þar sem mikil áhersla er lögð á teymisvinnu.“ 

Gígja Isis er sammála og bætir við „Ég tel það vera mjög mikilvægt fyrir unga hönnuði að sanka að sér sem mest af reynslu sem fatahönnuðir og læra almennilega á bransann. Þetta var einstaklega skemmtilegt samstarf og ég er viss um að við munum vinna að fleiri verkefnum saman í framtíðinni.“