Íslensk sænorn slær í gegn í Telegraph

„Það er þvílíkt stórt fyrir mig, þetta gefur manni svo mikið og eru ákveðin verðlaun fyrir alla vinnuna sem maður hefur lagt í þetta,“ segir hin 26 ára gamla leikkona Erla Brynjarsdóttir sem er nýkomin heim eftir langa dvöl í London þar sem hún lék í verkinu Litlu hafmeyjunni. Hún hefur fengið prýðisdóma í virtum erlendum miðlum á borð Telegraph, The Stage og One Stop Arts fyrir leik sinn í verkinu.

Litla hafmeyjan var sett saman af leikhóp sem samanstendur af fjórum breskum leikurum sem voru með Erlu í bekk í Rose Bruford College í London en hún útskrifaðist þaðan árið 2011. „Þau kalla sig Blind Tiger Theatre Company og er hópurinn núna tveggja ára. Þau hafa áður sett upp tvær leiksýningar sem hefur hlotið einróma lof áhorfenda,“ útskýrir Erla.

Litla Hafmeyjan fjallar um líf skáldsins H.C. Andersen og tvinnast saman við upprunalegu útgáfuna af ævintýrinu um hafmeyju sem hlýtur dapurleg örlög. Alls voru 36 sýningar sýndar í Riverside Studios-leikhúsinu í Hammersmith-hverfi í London.

„Ég fór með fjögur hlutverk í sýningunni en þeirra stærst var hlutverk sænornarinnar og mér til mikillar ánægju hafa breskir gagnrýnendur ausið mig lofi fyrir þá túlkun,“ segir Erla létt í lundu.

Erla hefur lítið unnið hér á landi því strax eftir útskrift árið 2011 var hún ráðin sem sögumaður í sjö mánuði hjá spænsku leiklistarfyrirtæki sem heitir Forum Teatro y Educación. „Ég bjó í Valencia en kom fram og ferðaðist um alla Spán að heimsækja leikskóla og barnaskóla til að kenna spænskum börnum ensku í gegnum leiklist. Sýningarnar voru tvær og þær voru Pinocchio og Hamelin the Flutist.“ Hún bætir við að þar hafi hún upplifað bæði sínar verstu martraðir og einnig þvílíka sigra.

Erla sneri til Íslands eftir Spán og var ráðin sem svokallaður gestgjafi hjá Bláa Lóninu. „Þetta var tilraunaverkefni hjá fyrirtækinu en fjórir leikarar voru ráðnir til þess að vera með um klukkutíma leiðsögutúr um lónið þrisvar á dag, taka fríar myndir af gestum í lóninu og sjá til þess að upplifun gesta væri sem best með alls konar hætti. Þetta er frábær vinna sem gefur manni aukna reynslu og lærdóm í samskiptum við alls konar fólk og karaktera af ólíkum uppruna sem kemur sér vel í leiklistinni,“ útskýrir Erla.

Hún hefur þó að undanförnu verið tíður gestur á skjám landsmanna í tveimur vinsælum sjónvarpsauglýsingum.

Þá sneri hún til London í nóvember síðastliðnum og lék í Litlu hafmeyjunni við frábærar undirtektir eins og fram hefur komið.

Sem stendur starfar Erla sem gestjafi í Bláa Lóninu en stefnir ótrauð á enn meiri frama í leiklistinni.