„Hér má smakka allt!“

„Við erum á stærstu gelato-sýningu í heimi sem heitir Sigep og er á Rimini á Ítalíu. Í fyrradag gengum við í níu tíma en náðum ekki að skoða næstum því allt,“ segir leikkonan Anna Svava Knútsdóttir. Hún er á sýningunni með sínum heittelskaða, kokkinum og ísgerðarmanninum Gylfa Þór Valdimarssyni sem opnaði ísbúðina Valdísi síðasta sumar.

„Við ætlum að gera alls konar nýtt í Valdísi á næstu vikum. Við erum hér til að fá hugmyndir að nýjum bragðtegundum og jafnvel búningum fyrir starfsfólkið. Við erum líka að leita að vöffluvél sem er nógu öflug til að þjóna öllum kúnnunum okkar. Núna erum við bara með fjögur járn til að baka á og þau eru nánast alltaf í gangi,“ segir Anna Svava.

Fjöldinn á sýningunni er gífurlegur en talið er að um 150 þúsund manns sæki hana í ár.

„Við þurftum að fara í röð til að reyna að komast inn og lögreglan stjórnar bílaumferð inn á svæðið. Hér er svo mikið að sjá og hér má smakka allt!“ bætir Anna Svava við glaðbeitt.