Aldarafmæli fagnað með stæl

Skipafélagið Eimskip hélt upp á hundrað ára afmæli sitt í Hörpu á föstudagskvöldið. Mikið var um góða gesti en veislan byrjaði á léttu hanastéli áður en gestum var boðið á tónleika í Eldborg.

Meðal söngvara voru Björgvin Halldórsson, Bubbi, KK, Kristjana Stefánsdóttir, Stefán Hilmarsson og Eyjólfur Kristjánsson.

Leikarinn Björn Hlynur Haraldsson var kynnir kvöldsins og fór yfir sögu Eimskipafélagsins á léttu nótunum.

Eftir tónleikana var boðið upp á glæsilegar veitingar í Silfurbergi þar sem skeggrætt var fram á nótt.