Heppin að fá að deila sviði með Fleming

Hjördís Elín Lárusdóttur, sem er betur þekkt sem Dísella Lárusdóttir, er á æfingu í Metropolitan-óperunni þegar blaðamaður Fréttablaðsins hringir í hana.

Hún kveðst vera í fullum skrúða, í grænum búningi með perlum. Hún er um þessar mundir við æfingar á óperunni Rusölku eftir Dvorák.

Í aðalhlutverki sýningarinnar er hin heimsfræga óperusöngkona Renée Fleming. „Þessi æðislega ópera er í raun sagan um litlu hafmeyjuna eftir Hans Christian Andersen.

Hún endar ekki eins vel og Disney-útgáfan, sækir meira í gamla ævintýrið eftir H.C. Andersen. Rusalka er hafmeyjan sem er flutt af Renée Fleming.

Þarna er líka vatnaskrímsli og þrjár skógardísir og ég fer með hlutverk einnar skógardísarinnar.“

Dísella er þakklát fyrir tækifærið til að fá að taka þátt í óperunni. „Nógu stórfenglegt er að fá að syngja á þessu sviði en að fá að deila því með Renée Fleming er ennþá betra!

Hún er átrúnaðargoðið mitt. Þetta þýðir auðvitað að fólk sækir í nafnið hennar, sækist eftir að sjá sýningar með henni. Í leiðinni sér það mig sem er mikil auglýsing fyrir mig. Þá er eins gott að klúðra því ekki.“

Dísella segir æfingahraðann á sýningum í óperuhúsinu vera mikinn. „Við byrjuðum að æfa fyrir þremur vikum. Síðan var fyrsta hljómsveitaræfing í gær, forsýning á mánudaginn og frumsýningin næsta fimmtudag.“

Þótt Rusalka sé sýnd í New York gefst Íslendingum kostur á að sjá sýninguna

„Metropolitan-óperan stendur fyrir beinum útsendingum á völdum sýningum um allan heim, þar á meðal á Rusölku þann 8. febrúar. Það verður því hægt að sjá þessa sýningu í beinni útsendingu á Íslandi í Kringlubíói.“

Hún telur að þeir sem hafa áhuga á leikhúsi eða sviðsetningu gætu haft áhuga á sýningunni. „Það hafa kannski ekki allir áhuga á óperu en settið er mjög fallegt. Þetta er ævintýraleg sýning.“

Dísella hefur verið viðloðandi Bandaríkin síðustu ár og nú er hún búsett í Harlem í New York.

„Ég er sjaldan í fríi, en þegar ég er í fríi er auðvitað gaman að líta í kringum sig í borginni.

Ég bý í Harlem sem hefur verið í mikilli uppbyggingu, frábært hverfi sem er aðeins í tuttugu mínútna fjarlægð frá vinnunni, en það er hins vegar alræmd dópgata við hliðina á okkur.

Okkur var sagt þegar við fluttum hingað: „Hvað sem þið gerið, ekki fara niður þessa götu,“ þannig að við sleppum því bara, annars fínt hverfi.“

Dísella er alltaf með annan fótinn á Íslandi. „Ég segi aldrei að ég búi í New York þótt ég sé að vinna hér.

Ég á íbúð heima og planið er alltaf að vera meira þar en það er erfitt að plana hlutina fyrirfram í þessu söngvaralífi. Það er reyndar búið að vera ansi stabílt í ár.

Ég sé fram á að geta verið meira heima á næsta ári en það er ekki alveg komið á hreint.“