Skapandi bollakökunámskeið fyrir börn

Gotterí og gersemar halda skemmtileg og hugmyndarík námskeið fyrir ungu kynslóðina.

„Barna- og unglinganámskeiðin eru fyrir alla unga áhugamenn um kökuskreytingar frá 8 ára aldri. Á bollakökunámskeiðunum er farið yfir baksturstækni, leiðbeiningar í smjörkremsgerð og mismunandi stífleika á kremi fyrir margvíslegt skraut,“ segir Berglind Hreiðarsdóttir sem rekur Gotterí og gersemar.

Fyrstu námskeiðin hafa lofað góðu og segir hún börnin hafa verið himinlifandi með afraksturinn. Berglind segir að á bollakökunámskeiðunum sé einnig farið yfir hvernig lita skal krem og gera tvílitt. Kennd er notkun á pokum og stútum ásamt spraututækni fyrir einfaldar og fallegar skreytingar.

„Þar sem börn og unglingar eru yfirleitt með hugmyndaflugið í lagi er leyfilegt að leika sér með hráefnið að vild og skreyta kökur eftir eigin höfði. Í lok námskeiðs fá allir að taka kökurnar sínar með heim til að deila með fjölskyldu og vinum, ef þeir tíma því.“

Meðfylgjandi myndir voru teknar á bollakökunámskeiði sem haldið var í lok árs. Nánari upplýsingar á gotteri@gotteri.is