Ég er eiginlega alltaf með snjáldruna opna

Nafn? Fjölnir Geir Bragason



Aldur?  48 ára

Starf?  Fjöllistamaður

Hvern faðmaðir þú síðast? Litla labbakútinn minn, hann Fenri Flóka, þegar ég var að svæfa hann eftir að hann vaknaði af værum blundi í nótt sem leið.

En kysstir? Kristínu Lilju, konuna mína, áður en ég hélt til starfa í morgun.

Hver kom þér síðast á óvart og hvernig? Konan mín bara síðast í gær þegar hún eldaði handa mér dýrindis lax þegar ég bjóst við kjúlla í kvöldmat. En hún borðar sjálf ekki lax þannig að ég bjóst engan veginn við því.

Hvaða galla í eigin fari ertu búinn að umbera allt of lengi? Frestunaráráttu og skipulagsleysi en það eru fylgifiskar athyglisbrests míns.

Ertu hörundsár? Nei, það get ég ekki sagt. Þó ég hafi nú eflaust mín þolmörk.

Dansarðu þegar enginn sér til? Já, já, það kemur fyrir þegar vel liggur á mér.

Hvenær gerðirðu þig síðast að fífli og hvernig? Er maður ekki alltaf að því á einn eða annan hátt?

Hringirðu stundum í vælubílinn? Nei, það geri ég ekki enda fátt sem fer meira í taugarnar á mér en væl og drama.

Tekurðu strætó? Það kemur fyrir þó það sé sjaldnar í seinni tíð.

Hvað eyðirðu miklum tíma á Facebook á dag? Ég er eiginlega alltaf með snjáldruna opna vegna þess hvað ég fæ margar vinnutengdar fyrirspurnir þar.

Ferðu hjá þér þegar þú hittir fræga eða heilsarðu þeim? Nei, það geri ég ekki og ég reyni að heilsa alltaf öllum að fyrra bragði. Það léttir iðulega andrúmsloftið.

Lumarðu á einhverju sem fáir vinir þínir vita um þig? Það geri ég svo sannarlega og þannig mun það verða áfram um ókomna tíð.

Hvað ætlarðu alls ekki að gera um helgina? Djamma. Faðmur fjölskyldunnar hefur forgang.