Heillandi barnaveröld í búðinni

„Eftir ábendingar frá viðskiptavinum okkar kom upp sú hugmynd að við myndum bjóða upp á barnabækur og í kjölfarið opnuðum við barnaveröld í kjallara búðarinnar,“ segir Svanhildur Eva Stefánsdóttir, sem er eigandi verslunarinnar Spilavina ásamt Lindu Rós Ragnarsdóttur.

Barnaveröldin er sannkallað ævintýraland fyrir börnin en þar er að finna helli, litla verslun, gat í gegnum vegg og ýmislegt skemmtilegt. Það eru hjónin og hönnuðirnir Linda Mjöll og Daníel Hjörtur sem standa á bak við hönnunina á barnaveröldinni.

Verslunin Spilavinir var opnuð árið 2007 en ýmsir viðburðir eru á döfinni þar eins og spilakvöld og spilastundir. „Einnig ætlum við að halda viðburði tengda barnabókmenntum á næstunni,“ bætir Svanhildur Eva við.