Dásamar íslenska tónlistarmenn

Jim Beckmann, starfsmaður útvarpsstöðvarinnar KEXP í Seattle í Bandaríkjunum, hefur valið tuttugu bestu íslensku plötur síðasta árs.

Fer Jim fögrum orðum um íslenska listamenn og rómar þá miklu hæfileika sem finnast á eyjunni í Atlantshafinu. Meðal nafna á listanum eru Mammút með Komdu til mín svarta systir, Sigur Rós með Kveikur, Grísalappalísa með ALI, Sin Fang með Flowers, Snorri Helgason með Autumn Skies, Cell7 með Cellf, Ólafur Arnalds með For Now I Am Winter, Lay Low með Talking About the Weather, Drangar með Dranga og Botnleðja með Þegar öllu er á botninn hvolft.

Á vefsíðu stöðvarinnar stendur enn fremur að staðið hafi til að velja tíu bestu íslensku plöturnar en vegna ógrynnis af góðum plötum hafi það verið ómögulegt. Því hafi verið ákveðið að velja tuttugu bestu plöturnar.

Jim hlakkar einnig mikið til tónlistarársins sem var að ganga í garð og bíður í ofvæni eftir nýju efni frá Sóleyju, For a Minor Reflection, og enskri útgáfu plötunnar Dýrð í dauðaþögn með Ásgeiri Trausta.