Stofnandi Black Flag sakaður um níð

Marina Ginn, fyrrverandi eiginkona Gregs Ginn, eins stofnenda bandarísku pönksveitarinnar Black Flag hefur ásakað hann um að misnota dætur þeirra.

Í október fór Marina með forræðismál fyrir dómstóla og krafðist fulls forræðis yfir dætrum þeirra, Isadoru, sem er 10 ára, og Karis, sem er sjö ára.

Í eiðfestri yfirlýsingu segir að Greg hafi verið „óútreiknanlegur og hrottalegur“ og að hann hafi „stefnt lífi og andlegri heilsu barnanna í hættu“. Í skjalinu segir að börnin hafi „kvartað undan því að hegðun hans yrði óútreiknanlegri með hverjum degi“ en þar segir að Greg hafi neitað að gefa þeim mat og haft í hótunum við þær. Að hann misnoti áfengi og vímuefni í viðurvist þeirra og að þær hafi orðið vitni að áflogum og líkamlegu ofbeldi í húsinu sem þær búi í.

Í skjalinu segir að Greg hafi neytt dæturnar til að taka til á heimilinu langt fram á nótt, læst þær inni í herbergi tímum saman og skvett vatni framan í þær. Þá segir að Greg hafi áreitt dætur sínar með því að blístra á þær, segja þeim að fara í megrun og segja við þær „þú ert heit“.

Black Flag var stofnuð árið 1976 og hefur verið kölluð „fyrsta harðkjarnasveit Bandaríkjanna“.