Heltekin af vaxtarrækt og vöðvum: Gerir allt til að ná markmiðum sínum

Vaxtarræktarkonan Ragnhildur Gyða Magnúsdóttir hefur frá unga aldri verið gjörsamlega heltekin af vaxtarrækt og vöðvum almennt.

Hún á sér þann háleita draum að fá að taka þátt í vaxtarræktarkeppninni Miss Olympia.

Í dag er þó útlit fyrir að hún og aðrar konur í heiminum fái aldrei tækifæri til þess að láta þann draum rætast því sú þróun er að eiga sér stað að verið er að fella alfarið niður kvennavaxtarækt.

Nú þegar er búið að taka hana út af dagskrá á mótum eins og Arnold Classic, evrópumeistara- og heimsmeistaramótum. 

Þá hefur hún þegar liðið undir lok hér á Íslandi en flokkurinn var með á dagskrá í hinsta sinn á bikarameistaramóti IFBB sem haldið var í nóvember á síðasta ári.

Ragnhildur segir margar ranghugmyndir í kringum sportið og er ósátt með að ekki sé lengur hægt að keppa hér á landi í vaxtarrækt kvenna og kennir fordómum um.

„Ég hef lent í því að það komi upp að mér eldri karlmenn sem spyrja mig hvort ég sé karl eða kona. Og ég hef lent í því að fá neikvæð komment á myndir hjá mér. Að þetta sé ógeðslegt og svona eigi konur ekki að vera,“ segir Ragnhildur.

Hún bætir þó við að hið jákvæða vegi upp á móti þessu neikvæða og lætur ekkert stoppa sig.

Ætlar sér að ná markmiðum sínum

Hún segir þó að fólk velti vissulega fyrir sér hvort hægt sé að ná þetta undraverðum árangri án aðstoðar einhvers konar efna, sem og stera. 

Það skal þó tekið fram að steranotkun er ólögleg á Íslandi, en samkvæmt læknum sem Ísland í dag ræddi við má rekja fjölda dauðsfalla til steranotkunar.

„Ég geri það skynsamlega og læt fylgjast vel með öllu. Ég er fullkomlega heilbrigð með fullkomlega heilbrigða líkamsstarfsemi. Þannig að ef þú tækir mig og bærir mig saman við einhvern sem er búinn að reykja eða drekka alla sína ævi, ég hugsa að ég myndi koma miklu betur út,“ segir Ragnhildur.

„En að vera íþróttamaður sem borðar heilbrigðan mat og hreyfir sig reglulega. Jú, maður notar allar leiðir til að hjálpa sér að ná sínum markmiðum.“

Ísland í dag hitti Ragnhildi á dögunum. Hægt er að sjá viðtalið við hana í heild sinni í spilaranum hér að ofan.