Formaður VR þakkar jafnlaunavottun góðan árangur

Munur á heildarlaunum karla og kvenna hjá VR mælist 13,3 prósent í nýrri könnun. Munurinn mældist 21 prósent innan Starfsmannafélags ríkisins (SFR) fyrr í mánuðinum. Leiðréttur launamunur kynjanna, þar sem tillit er tekið til allra áhrifaþátta, mælist 8,5 prósent hjá VR og hefur aldrei verið lægri.

„Við erum mjög stolt af þessum mikla árangri,“ segir Ólafía B. Rafnsdóttir, formaður VR. Heildarmunur launa mældist 20,4 prósent í fyrstu launakönnun VR árið 2000.

Ólafía þakkar þetta meðal annars jafnlaunavottun sem VR hefur veitt 22 fyrirtækjum og stofnunum frá því í fyrra.

„Ég var síðast í síðustu viku í heimsókn hjá tveimur stórum fyrirtækjum þar sem ég var að kynna Jafnlaunavottun VR og fyrirtæki hafa áhuga á því að vinna með kerfisbundnum hætti að því að eyða þessum launamun,“ segir Ólafía Rafnsdóttir.