Verð á sjávarafurðum rýkur upp

Verð sjávarafurða í erlendri mynt hefur rokið upp á síðustu mánuðum. Frá febrúar til apríl hækkaði verð um 5% og hefur ekki hækkað meira á svo stuttu tímabili í fjögur ár. Framkvæmdastjóri LÍÚ segir verðhækkun hjálpa útgerðum í uppsjávarfiski eftir loðnubrest á síðasta fiskveiðiári.

Í Hagsjá hagfræðideildar Landsbankans sem birt er í dag er fjallað um þá verðhækkun sem orðið hefur á sjávarafurðum á síðustu mánuðum. Verð á uppsjávarfiski hefur hækkað um 13 prósent frá því í febrúar og fram í apríl á þessu ári. Verð á uppsjávarfiski hefur aldrei verið hærra samkvæmt úttekt Landsbankans. Verð á mjöli og lýsi hefur sömuleiðis hækkað hratt á síðustu mánuðum eða um tæp 12%.

Kolbeinn Árnason, framkvæmdastjóri Landsambands íslenska útvegsmanna, segir tíðindin ánægjuleg. „Verðþróunin er jákvæð sem eru góðar fréttir fyrir íslenskan sjávarútveg og þar með fyrir íslenskt samfélag því þetta er jú okkar undirstöðu atvinnuvegur og skilar sér vonandi til allra.“

Hvað skýrir þessa verðsveiflu nú?

„Skýringingin á hækkun verðs í uppsjávarfiski er vegna þess að menn sjá fyrir sér minni afla í suðurhöfum í samkeppnistegundum,“ segir Kolbeinn. „Markaðurinn er að ná einhverju jafnvægi eftir mikla aukningu á þorski úr Barentshafi.“

Bætir upp fyrir loðnubrest

Nýliðin loðnuvertíð var næst lélegasta vertíðin á þessari öld þegar aðeins um 110 þúsund tonn komu að landi. „Þetta er jákvætt fyrir útgerðirnar í uppsjávarfiski þar sem loðnubrestur varð í vetur og menn hafa haft áhyggjur af því að þar verði þröngt í búi. Verðhækkunin bætir það vonandi að einhverju leyti,“ segir Kolbeinn.

Meiri bjartsýni ríkir fyrir komandi loðnuvertíð en Hafrannsóknastofnun vonast til að geta gefið út kvóta upp á rúm 450 þúsund tonn. Kolbeinn segir margt benda til þess að næsta fiskveiðiár verði íslenskum sjávarútvegi gott.

„Verðið virðast vera á réttri leið. Flestir stofnar eru í ágætis standi og vonandi verður þetta gott ár,“ segir Kolbeinn. „Það eru alltaf einhverjir stofnar sem eru á niðurleið, t.a.m. eru vondar fréttir af ýsunni sem auðvitað kemur illa við einhverja. Yfir það heila þá held ég að við séum á nokkuð góðum stað.“