Sigurjón Árnason: „Alröng niðurstaða“

„Í mínum huga er þetta alröng niðurstaða og mér finnst eins og það sé verið að dæma fyrir eitthvað sem ekki var ákært fyrir,“ segir Sigurjón Þ. Árnason, fyrrverandi bankastjóri Landsbankans. Sigurjón var í Héraðsdómi Reykjavíkur í dag dæmdur í tólf mánaða fangelsi, þar af níu mánuði skilorðsbundna.  Þá voru tveir undirmenn hans, Ívar Guðjónsson og Júlíus Steinar Heiðarsson, dæmdir í níu mánaða fangelsi, þar af sex mánuði skilorðsbundna.

Sakfelldir fyrir 5 viðskiptadaga af 228

Fjórmenningunum var gefið að sök að hafa handstýrt verði hlutabréfa í aðdraganda hrunsins á tímabilinu 1.nóvember 2007 til 3.október 2008. Samtals 228 daga. Sigurjón, Ívar og Júlíus voru í morgun sakfelldir fyrir tímabilið 29.september til 3.október 2008. Samtals fimm daga. 

„Það að það sé búið að velja einhverja örfáa daga rétt síðustu dagana fyrir hrun finnst mér ekki vera í samræmi við það sem ákært var fyrir. Ef maður hefði vitað það þá hefði maður átt að verjast því, því þá hefði maður auðvitað gert það. Ákæran var einfaldlega of óljós til að hægt hafi verið að verjast henni. En annars breytir það því ekki að í mínum huga voru öll þessi viðskipti 100 prósent eðlileg og ekkert rangt við þau á nokkurn hátt,“ segir Sigurjón. 

Í niðurstöðu dómsins segir að starfa þeirra vegna hafi þeir borið ríkar skyldur gagnvart aðilum markaðarins, einstaklingum sem lögaðilum, sem áttu að geta treyst því að verð og eftirspurn hlutabréfa í Landsbankanum lyti eðlilegum markaðslögmálum. Brot þeirra hafi verið stórfellt og varið dögum saman ásamt því að varða fjárhagsmuni fjölmargra fjárfesta.

Saksóknari segir niðurstöðuna koma á óvart

Málið sem um ræðir er eitt það stærsta sem sérstakur saksóknari hefur haft til rannsóknar í kjölfar efnahagshrunsins.  Málinu var skipt upp í þrjá hluta vegna umfangs þess og hefur Sigurjón verið sýknaður í tvígang. Þeim málum hefur ríkissaksóknari áfrýjað til Hæstaréttar.

Björn Þorvaldsson saksóknari sagði niðurstöðuna hafa komið á óvart.  „Þetta er vægari refsing en við áttum von á. Það virðist hafa verið dæmt fyrir styttra tímabil heldur en ákært var fyrir. En við þurfum að fara yfir þetta og meta það svo í framhaldinu,“ sagði Björn.

Uppfært klukkan 16:17

Sigurður G. Guðjónsson, lögmaður Sigurjóns, staðfestir í samtali við fréttastofu að dómnum verði áfrýjað til Hæstaréttar.