Einstakur samhugur á jólahátíð

Jólahátíð fatlaðra fer fram á Hilton Reykjavík Nordica á annað kvöld. Þetta er í 32. sinn sem André Bachmann stendur fyrir hátíðinni en yfir 1.400 manns sóttu hátíðina í fyrra.

Hátíðin er fyrir löngu orðin ómissandi þáttur í jólaundirbúningi fatlaðs fólks og aðstandenda þeirra. Aðgangur er ókeypis.

Að vanda gefur fjöldi listafólks vinnu sína á hátíðinni og komast þar færri að en vilja, enda er hátíðin orðlögð fyrir þann einstaka og einlæga samhug sem þar ríkir, eða eins og einn tónlistarmaður hafði á orði eftir síðustu hátíð: „Ég hef aldrei kynnst annarri eins stemningu og þakklæti á nokkrum tónleikum sem ég hef verið á síðustu 25 ár.“

Fram koma að þessu sinni: Heiða Ólafs, Laddi, Hreimur, Gummi Jóns og Vestanáttin, Lögin úr teiknimyndunum, Ingó Veðurguð, Skítamórall ásamt André Bachmann og hljómsveitinni Mjallhvíti.

Skólahljómsveit Árbæjar- og Breiðholts undir stjórn Snorra Heimissonar leikur í anddyri frá 19.15. Kynnir sem fyrr er Sigmundur Ernir Rúnarsson, skáld og rithöfundur. Heiðursgestur er forseti Íslands, Ólafur Ragnar Grímsson. Skemmtunin stendur frá kl. 20.00 til 21.30.