Sá um teikningarnar í Sundance-kvikmynd

„Þetta er alveg rosalegt tækifæri fyrir mig,“ segir Sara Gunnarsdóttir myndskreytir, en hún sá um allar teikningar í myndinni The Diary of a Teenage Girl, sem sýnd verður á Sundance-kvikmyndahátíðinni í janúar.

„Myndin fjallar um 15 ára stelpu sem langar að vera listamaður. Hún teiknar mikið og allar myndirnar sem hún gerir í myndinni eru eftir mig,“ segir Sara, sem útskrifaðist úr Experimantal animation frá CalArt árið 2012. Leikstjóri myndarinnar, Mariella Heller, hafði samband við hana eftir að hún sá verkefni sem Sara hafði gert fyrir sjónvarpsstöðina MTV.

„Hún hafði samband við mig í febrúar 2013 og bað mig um að gera gera smá „teaser“ fyrir myndina. Svo í framhaldinu teiknuðum við upp söguna fyrir myndina. Vinnan hófst svo fyrir alvöru í mars,“ segir Sara, en þetta er fyrsta stóra myndin sem hún vinnur að. Meðal leikara í kvikmyndinni eru þau Alexander Skarsgard og Kristen Wiig og var Sara svo heppin að fá að hitta þau.

„Ég fór til San Francisco í janúar og að vinna með listrænu stjórnendum myndarinnar. Þá hitti ég þau og allt tökuliðið, sem var allt alveg frábært fólk,“ segir hún, og bætir við að Skarsgard sé alveg jafn myndarlegur í raunveruleikanum og í myndum. „Hann er samt svolítil týpa í þessari mynd, með mikið „70‘s“ yfirvaraskegg.“

Sara býr í Brooklyn þar sem hún er sjálfstætt starfandi myndskreytir. Hún er eins og er í veikindaleyfi, en hún þjáist af tennisolnboga, sem eðlilega er ekki það besta sem getur hent teiknara.

„Ég var farin að finna fyrir þessu áður en við byrjuðum að vinna við myndina. Ég fór í gegnum hana á þrjóskunni. En ég er að gjalda fyrir það núna,“ segir hún og hlær. Sundance hátíðin verður haldin í bænum Park City í Utah dagana 21. janúar til 1.febrúar.

„Ég er rosalega spennt fyrir Sundance og ætla að fara þegar myndin verður frumsýnd, eða 24.janúar,“ segir hún. En mun þessi mynd ekki opna mörg tækifæri fyrir hana? „Ég bara hef ekki hugmynd, við verðum bara að sjá til.“