90 ára afmæli Rauða krossins á Íslandi

Íslandsfélag Rauða krossins, stærstu mannúðarsamtaka í heimi, fagnar merkum tímamótum í dag.

Liðin eru 90 ár frá stofnfundi félagsins sem fram fór í Eimskipafélagshúsinu árið 1924 þar sem Sveinn Björnsson, síðar fyrsti forseti lýðveldisins, var kjörinn formaður Rauða krossins.

Síðan hefur mikið vatn runnið til sjávar, verkefnin hafa verið fjölmörg.

Á fyrstu áratugum Rauða krossins á Íslandi voru hvers kyns lýðheilsuverkefni, heimahjúkrun, tímabundinn rekstur spítala og blóðsöfnun stór hluti af verkefnum félagsins. Kann það að skýrast af miklum áhuga lækna á Rauða krossinum en meðal fimm fyrstu formanna voru fjórir þeirra einmitt læknar.

Rauði krossinn hefur ekki alveg sagt skilið við þjónustu gagnvart heilbrigðiskerfinu og rekur enn allar sjúkraflutningabifreiðar á Íslandi. Þá er vert að minnast á skyndihjálpina. Þeir sem læra skyndihjálp á Íslandi gera það langflestir hjá skyndihjálparkennurum Rauða krossins.

Verkefnin eru fleiri og eiga þau það sameiginlegt að aðstoða fólk og veita því aðhlynningu í neyð. Má þar nefna félagslega aðstoð til innflytjenda, aldraðra og annarra sem upplifa félagslega einangrun. Rauði krossinn veitir hælisleitendum og flóttamönnum aðstoð og hefur frá 25. ágúst í ár annast allt málsvarastarf fyrir hælisleitendur. Athvörf eru rekin fyrir fólk með geðraskanir, Konukot er starfrækt fyrir heimilislausar konur og hjálparsíminn 1717 hefur ófáum hjálpað.

Á alþjóðavettvangi hefur Rauði krossinn á Íslandi átt fulltrúa í Síerra Leóne þar sem ebólufaraldur geisar, verkefni hafa verið rekin í Malaví og Sómalílandi þar sem komið hefur verið á fót heilsugæslu á hjólum og aðbúnaður skólabarna hefur verið bættur. Langtímaverkefni eru einnig í fullum gangi í Hvíta-Rússlandi, Kákasuslöndunum og í stríðshrjáðri Palestínu. Þá er ótalin neyðaraðstoð sem veitt var í formi mannafla og sérfræðiþekkingar á Filippseyjum í kjölfar fellibylsins Haiyan.

Vinna að þessum mannúðarverkefnum, auk allra þeirra verkefna sem að baki eru, væri aldrei möguleg án stuðnings almennings og, fyrst og fremst, sjálfboðaliða Rauða krossins. Í tilefni af þessum merku tímamótum vill Rauði krossinn bjóða til afmælisveislu í húsi félagsins við Efstaleiti 9 í Reykjavík í dag. Allir eru velkomnir og verður húsið opið milli 14 og 18. 

Afmælisdagskrá Rauða krossins í dag

14.00 Húsið opnað.

14.30 Gunni og Felix syngja skyndihjálparlagið ásamt 50 barna kór frá Leikskólanum Langholti.

14.40 Afmælishátíðin sett. Forseti Íslands ávarpar gesti.

15.00 Tónlist – Skuggamyndir frá Býsans.

15.45 Sjúkrabílar afhentir með viðhöfn.

16.00 Sirkus Íslands.

16.45 Skoppa og Skrítla.

17.30 Tónlist – Stefán Hilmarsson.