Kenna krökkum um sjálfbærni og umhverfisvæn sjónarmið

„Þessi hugmynd er sótt til Svíþjóðar og gengur í raun út á það að kenna börnum ýmislegt í tengslum við sjálfbærni og umhverfisvæn sjónvarmið,“ segir Hjördís Eva Þórðardóttir, réttindafræðslufulltrúi UNICEF á Íslandi. Ungmennaráð UNICEF stendur fyrir skiptidótamarkaði í Borgarbókasafninu við Tryggvagötu en þar geta börn gefið dótið sitt á markaðinn og fengið eitthvert annað dót í staðinn.

„Þetta virkar þannig að barnið leggur eitthvert leikfang eða bók inn í leikfangabanka og fær þá stimpil fyrir hvern hlut. Þá má barnið leika sér með þau leikföng sem í bankanum eru og svo velja sér annað dót í staðinn,“ útskýrir Hjördís Eva.

Markmiðið er að gefa börnum tækifæri til að leika sér, á sama tíma og þau læra um réttindi sín og umhverfisvæn sjónarmið. Boðið verður upp á vinnusmiðjur, þar sem börnin fá að vinna skapandi verkefni í tengslum við greinar úr Barnasáttmála Sameinuðu þjóðanna. „Ég held að við séum að setja flóknar upplýsingar á einfalt form, og kenna þeim í gegnum leik. Þetta er svokallað „learning by doing“,“ segir Hjördís Eva.

Hún hefur sjálf farið með fjögurra ára son sinn á slíkan markað og sagði að sú reynsla hefði verið mjög ánægjuleg og lærdómsrík fyrir þau bæði.

Skiptidótamarkaðurinn fer fram í barnadeild Borgarbókasafnsins við Tryggvagötu og hefst klukkan 15.00 á sunnudaginn.