Fimmtug og öflugri en nokkru sinni fyrr

„Þetta er ótrúleg tala en mér líður vel. Mér líður eins og ég sé enn 25 ára,“ segir kaupmaðurinn Svava Johansen sem er fimmtug í dag. Hún eyðir afmælisdeginum sínum erlendis með sínum heittelskaða, Birni Sveinbjörnssyni, og góðum vinum en vill ekki gefa upp nákvæma staðsetningu.

„Við erum í sólinni og horfum út á Miðjarðarhafið. Við erum hér að spila golf og ég vildi óska að sonur minn væri með. Ég reyndi að draga móður mína líka með en hún komst ekki,“ segir Svava létt í bragði. Hún stefnir á að halda stóra veislu í sumar.

„Ég á afmæli 7.1. en ætla að halda upp á það 1.7. því þá er líklegra að sé sól á Íslandi. Ég ætla að safna mér orku á afmælisdaginn og halda stórum vinahópi og fjölskyldu geggjaða veislu í sumar.“

Aldurinn leggst vel í athafnakonuna.

„Ég upplifi á svo margan hátt, bæði fyrir sjálfa mig, Ísland og heiminn, að 2014 verði mjög gott ár. Ég held að árið 2014 verði eitt það langbesta frá hruni. Ég er ánægð með að verða fimmtug – nú er ég komin á þann aldur að maður er ánægðari með að ná vissum aldri en að ná honum ekki. Ég er í góðu líkamlegu ástandi, með alla þessa reynslu á bakinu og með gríðarlegan kraft. Mér finnst eins og ég sé með marga orkusteina í hvorri hendi og með meiri orku en áður með alla mína reynslu og visku. Ég er öflugri en nokkru sinni fyrr. Ég er líka svo ánægð með það sem ég á; son minn og manninn minn og það góða fólk sem er í kringum mig. Ég er líka glöð með fyrirtækið mitt og þann sterka hóp sem stendur með mér í mínum rekstri. Ég er svo heppin að eiga mikið af góðum vinum og sterka, stóra og góða fjölskyldu – það gefur manni kraft í lífinu,“ segir Svava og sér ekki eftir neinu á þessari hálfu öld.

„Ég horfi alltaf fram á við. Ég held að ég verði alltaf þannig. Ég er ánægð með allt sem ég hef gert og sé ekki eftir neinu. Mér finnst ofsalega gott að lifa lífinu þannig að maður sé góður við sig og sína og þá sem verða á vegi manns. Þá situr maður sáttari eftir þegar maður horfir yfir farinn veg. Mitt mottó er að ég geti sagt að ég hafi gert eitthvað gott ef ég næ að verða gömul. Ég vil ekki gera eitthvað sem ég sé eftir,“ segir Svava og endar samtalið á jákvæðum nótum.

„Ég óska öllum gleðilegs nýs árs og vil að allir beri það í hjarta sínu að 2014 verði frábært ár því hver er sinnar gæfu smiður.“