Rasmus: Stefán Logi búinn að tala við mig

Danski miðvörðurinn Rasmus Christiansen, sem lék í þrjú sumur við góðan orðstír hjá ÍBV í Pepsi-deild karla í knattspyrnu frá 2010-2012 hefur verið sterklega orðaður við endurkomu til Íslands að undanförnu og þá helst til KR sem ætlar að styrkja varnarlínu sína í vetur.

Rasmus gekk í raðir norska B-deildarliðsins Ullensaker/Kisa fyrir tveimur árum og spilaði þar með Stefáni Loga Magnússyni, markverði KR, á síðustu leiktíð.

„KR er flottur klúbbur og ég þekki Stefán Loga mjög vel. Hann er búinn að segja mér flotta hluti um KR, en ég get ekki sagt í dag að ég sé á leiðinni í KR. Það væri lygi,“ segir Rasmus í samtali við Vísi.

Samningur Danans við Ull/Kisa rennur út í desember og vill hann komast frá liðinu sem er að falla niður í C-deildina í Noregi. Hann er þó ekki sérstakri samningsstöðu vegna alvarlegra meiðsla.

„Ég sleit krossband í maí og fór í aðgerð í júní. Draumurinn er að fara í betri deild en það gæti verið erfitt vegna meiðslanna. Það er kannski smá séns á að lið í úrvalsdeildinni bjóði mér samning. Ull/Kisa er búið að bjóða mér nýjan samning en það er ekkert spennandi að vera hér áfram,“ segir Rasmus.

Miðvörðurinn öflugi er opinn fyrir því að koma til Íslands og KR kemur vel til greina. Hann hefur ekki talað formlega við Rúnar Kristinsson eða forsvarsmenn félagsins, en hefur sem fyrr segir verið í sambandi við vin sinn Stefán Loga.

„Það gekk mjög vel hjá okkur Stefáni Loga að spila saman og við höfum spjallað mikið saman um það. Ég fór í heimsókn til hans og æfði aðeins með KR en það var ekkert meira en það,“ segir Rasmus sem vonast til að komast aftur af stað í janúar.

„Það er alveg möguleiki að fara aftur til Ísland. Það er kannski fín hugmynd til að fá hnéð aftur í gang. Ef maður getur byrjað að æfa í janúar og tímabilið hefst ekki fyrr en í maí hentar það vel til að passa að krossbandið sé í lagi. Mér líst líka vel á að koma aftur til Íslands. Ég þekki mikið af fólki þar og líður vel á Íslandi,“ segir Rasmus Christiansen.