Konungsfjölskyldan skeri niður útgjöld

Sparnaður bresku konungsfjölskyldunnar hefur skroppið saman í 190 milljónir króna. Sjóðurinn stóð í um 627 milljónum króna í upphafi ársins 2012. Hann er hugsaður sem varasjóður sem grípa má til í neyðartilfellum.

Breska konungshöllin fékk hátt í sex milljarða króna á breskum fjárlögum árin 2012 og 2013. Það dugði ekki fyrir útgjöldum, þannig að gengið var á varasjóðinn. 

Þetta kemur fram í skýrslu fjárreiðunefndar breska þingsins. Í skýrslunni var konungshöllin gagnrýnd fyrir að vanrækja viðhald á sögulegum byggingum. Nefndin kallar eftir því að konungsfjölskyldan skeri niður útgjöld, auki tekjur sínar og bæti viðhald á byggingum. Lagt er til að opnað verði í auknum mæli fyrir aðgang ferðamanna að höllinni gegn gjaldi.