Auðveldar sjálfstætt starfandi að skila launatengdum gjöldum

Ragnheiður Elín Árnadóttir, iðnaðar- og viðskiptaráðherra, opnaði vefinn Launaskil.is formlega í Atvinnuvega- og nýsköpunarráðuneytinu í dag. Markmið vefsins er að einfalda skil á launatengdum gjöldum þannig að sjálfsstætt starfandi einstaklingar geti einbeitt sér að því sem mestu máli skiptir, líkt og segir í fréttatilkynningu. „Með nokkrum einföldum skrefum er hægt að skila öllum gjöldum á réttan stað og krafa stofnast í heimabanka fyrir þeim gjöldum sem standa skal skil af.“

Frumkvöðlafyrirtækið ReonTech hannaði og þróaði vefinn en Launaskil.is er fyrir sjálfstætt starfandi einstaklinga. „Launaskil.is gerir notendum kleift að skila staðgreiðslu af tekjum til ríkisskattstjóra, skila lögbundnum lífeyri og viðbótarlífeyri til lífeyrisjóðanna, skila stéttarfélagsgjöldum til stéttarfélaga, skila virðisaukaskatti af tekjum og halda utan um uppsafnaðan persónuafslátt og ferlið tekur um eina mínútu í framkvæmd.“

Í tilkynningu segir að upplifun margra sem taka að sér auka verkefni og jafnvel þeirra sem hafa atvinnu af sjálfstæðum rekstri er sú að skil á launagjöldum sé flókið ferli og kostnaðarsamt. „Slíkt flækjustig stuðlar einnig að því að fólk taki á móti svörtum greiðslum til að komast hjá flóknum skilaleiðum og útreikningum.“

Í nútíma samfélagi er orðið algengara að fólk taki að sér allskonar verkefni. Það ekki alltaf klippt og skorið að einstaklingar starfi bara hjá einu fyrirtæki og einu tekjurnar komi þaðan. Nútíma Íslendingurinn vill hafa frelsi til að taka að sér aukastörf og fá þannig aukatekjur. Með Launaskil viljum við gera þeim auðveldara um vik að skila gjöldum af þessum tekjum og forðast bakreikning í ágúst.“ segir Ólafur Páll hjá Launaskil.

„Fyrirtækið ReonTech var stofnað árið 2011 og hefur frá upphafi verið staðsett á einu af frumkvöðlasetrum Nýsköpunarmiðstöðvar Íslands. Starfsmenn þess eru um 12 talsins og teymið samanstendur af einstaklega hæfileikaríkum og metnaðarfullum einstaklingum. Í starfsmannahópnum eru til að mynda þeir einu sem útskrifast hafa úr tölvunarstærðfræði frá HR og báðir þeirra eru á forsetalista skólans.“