„Skýr skilaboð til aðila vinnumarkaðarins“

„Þetta eru skýr skilaboð frá Seðlabankanum, annars vegar hvað varðar þann árangur sem náðst hefur. Verðbólgan er komin niður fyrir 2% og hefur verið fyrir neðan verðbólgumarkmið bankans um nokkurra mánaða skeið. Skilaboðin eru að sama skapi alveg skýr hvað það varðar að framhald vaxtaþróunar ræðst af næstu kjarasamningalotu. Ef að launahækkanir verði í samræmi við verðbólgumarkmið bankans að þá megi búast við frekari vaxtalækkunum. Ef að launahækkanir verði hins vegar langt úr hófi fram megi búast við því að vextir hækki á nýjan leik.“

Þetta segir Þorsteinn Víglundsson, framkvæmdastjóri Samtaka atvinnulífsins um lækkun stýrivaxta Seðlabanka Íslands, en ákvörðun varðandi þá var kynnt í morgun.

Aðspurður um hvort hann búist við að sjá einhver áhrif af lækkuninni strax í atvinnulífinu segir Þorsteinn:

„Það er alveg ljóst að fjárfestingarstigið er nátengt vaxtastiginu. Lækkandi vextir eiga því að örva fjárfestinguna. Að sama skapi hefur lækkunin áhrif á vaxtabyrði bæði einstaklinga og fyrirtækja. Þannig að þetta hefur umtalsverð áhrif á efnahagslífið. Vaxtastig okkar er ennþá miklu hærra en gengur og gerist í nágrannalöndunum. Það er auðvitað vegna þessa efnahagslega óstöðugleika sem við höfum búið við en ástandið fer batnandi. Vonandi er þetta bara fyrsta skrefið af mörgum í átt að sambærilegum vöxtum.“

En eru Samtök atvinnulífsins bjartsýn á að næstu kjarasamningar leiði til enn frekari vaxtalækkunar?

„Það hefur auðvitað verið mikil ólga í aðdraganda næstu kjarasamningalotu. Engu að síður hefur árangurinn af síðustu kjarasamningum verið ótvíræður og við teljum algjörlega nauðsynlegt að halda áfram á sömu braut.“

Þorsteinn segir að kaupmátturinn sé það sem skipti mestu máli auk þess að vaxtastig hér sé sambærilegt við það sem þekkist á nágrannalöndunum. Það hafi áhrif á stærsta útgjaldalið heimilanna, húsnæðiskostnað, hvort sem fólk er að borga af lánum eða er á leigumarkaði. Hvoru tveggja ræðst töluvert af vaxtakostnaði í landinu.