Telur LSR og LH þurfa 10 milljarða frá ríkinu

Fjármálaeftirlitið (FME) telur ríkið þurfa að setja um tíu milljarða króna á ári inn í B-deild Lífeyrissjóðs starfsmanna ríkisins (LSR) og Lífeyrissjóð hjúkrunarfræðinga (LH) á næstu árum. Annars geti sjóðirnir ekki staðið við skuldbindingar sínar og geti tæmst á næstu tíu til fimmtán árum.

Þetta sögðu Unnur Gunnarsdóttir, forstjóri FME, og Björn Z. Ásgrímsson, sérfræðingur á greiningarsviði stofnunarinnar, á kynningarfundi um stöðu lífeyrissjóðanna í gær.

Þar kom fram að heildar tryggingafræðileg staða íslenskra lífeyrisssjóða með ábyrgð ríkis og sveitarfélaga var við árslok 2013 neikvæð um 595 milljarða króna. Halli annarra lífeyrissjóða var á sama tíma samtals um 68 milljarðar eða nálægt jafnvægi.

„Þessar skuldbindingar eru til langs tíma og verða greiddar upp á næstu árum og áratugum.En einhvern tímann kemur að því það þarf að greiða þetta og því er nauðsynlegt að gera ráðstafanir með því að auka iðgjöld eða framlag til sjóðanna, eins og með þessum tíu milljörðum,“ segir Björn í samtali við Markaðinn.

„Sveitarfélögin hafa brugðist rétt við með því að borga viðbótarframlag inn í sjóðina sem bætir stöðu þeirra smám saman á næstu árum og ríkið mætti taka sér það til fyrirmyndar.“

Mikið hefur verið fjallað um vanda B-deildar LSR og LH. Fyrir um tveimur vikum tilkynnti fjármála- og efnahagsráðuneytið að það hefði ásamt ellefu hjúkrunarheimilum, LSR og LH undirritað samninga sem fela í sér yfirtöku ríkisins á nær öllum lífeyrisskuldbindingum hjúkrunarheimilanna vegna starfsmanna þeirra í B-deild LSR og LH.

Á fundi FME kom einnig fram að fimm stærstu lífeyrissjóðir landsins eiga rúm 55 prósent af 2.800 milljarða króna lífeyrissparnaði landsmanna. LSR er þar stærstur með 17,2 prósenta hlutdeild.

„Þetta sýnir mikilvægi þessara sjóða,“ segir Björn og bætir því við að lífeyrissjóðirnir hafi verið 37 talsins árið 2007 en séu nú 27.

„Við sjáum fram á að þeim muni fækka á næstu árum. Sem er jákvætt því sameining lækkar rekstrarkostnað og bætir ávöxtun lífeyrisþega,“ segir Björn.