Lestur kveikir á skilningarvitum

Páfuglinn sjálfur heimsækir Vatnsmýrina í Reykjavík á morgun laugardag með litskrúðugt safn barnabóka frá Norðurlöndum en þá verður sýningin Orðaævintýri sett í Norræna húsinu. Sýningin er hluti af alþjóðlegu barna- og unglingabókmenntahátíðinni Mýrinni sem hefst í næstu viku í Reykjavík.

Aðstandendur Mýrarinnar hafa löngum viljað auka þátt barna- og unglingabókmennta í hátíðinni og niðurstaðan varð sjö vikna sýning sem verður opin alla daga vikunnar milli kl. 12 og 17 fram í nóvember.

Sýningarstjórar Orðaævintýris eru rithöfundurinn Davíð Stefánsson og myndlistarkonan Kristín Ragna Gunnarsdóttir. „Markmiðið var að stækka þátt barna- og unglingabókmennta og búa til sannkallaða upplifunarsýningu um lestur og tungumál. Henni má eiginlega lýsa sem nýstárlegu ævintýralandi þar sem ný og gömul börn bregða á leik með tungumál, myndmál og bækur,“ segir Davíð en sýningin er sú stærsta sem sett er upp í Norræna húsinu á árinu.

Innblástur sýningarinnar er sóttur til þrettán norrænna barna- og unglingabóka og hafa sýningarstjórarnir tveir sökkt sér ofan í söguheim bókanna undanfarnar vikur. „Þetta verður sannarlega litríkt ævintýraland þar sem sýningargestir ganga inn í veröld bókanna og verða um leið þátttakendur í sögum og sagnagerð,“ segir Kristín.

Sýningin þekur um 380 fermetra rými í tveimur sölum í kjallara hússins og inniheldur níu stöðvar. „Búið verður að mála hvern einasta blett í líflegum og skærum litum í kjallaranum. Þetta verður mjög gagnvirk sýning þar sem hver bókanna fær sitt pláss, mismikið þó.“

Sýningin inniheldur meðal annars tveggja hæða timburkofa, segulljóðavegg, sundlaug fulla af kúlum með bókstöfum, sögutjald, spunasvið, veðurvegg, bókaísskáp og auðvitað páfuglinn sjálfan sem er tákn hátíðarinnar. „Að mörgu leyti má líkja páfuglinum við bók. Eins og margar bækur lætur hann ekki mikið fyrir sér fara út á við en þegar hann breiðir úr stélinu er eins og bókin opnist og ljúki upp öllum sínum leyndardómum. Þannig er páfuglinn að mörgu leyti svolítið tákn fyrir það hvað bókin er ríkt fyrirbæri. Þeir sem lesa mikið, og ekki síður þeir sem eiga börn, þekkja það vel hvaða töfrar geta kviknað þegar maður dettur inn í bók og lesturinn kveikir á öllum skilningarvitum.“

Að sögn Kristínar og Davíðs er sýningin ætluð öllum aldurshópum og þar eru eldri kynslóðirnar ekki undanskildar. „Við höfum fengist mikið við sköpun og það gilda alltaf sömu lögmál hvort sem um börn eða fullorðna er að ræða. Nær öllum finnst gaman að leika, skapa og uppgötva nýja hluti. Sumir þeirra fullorðnu eru kannski búnir að gleyma því en þeir hafa þá bara gott af að kíkja á sýninguna og verða börn aftur.“

Páfugl út í mýri – Orðaævintýri stendur yfir alla daga vikunnar frá 4. október til 23. nóvember í kjallara Norræna hússins. Sýningin er opin öllum og aðgangur er ókeypis. Nánari upplýsingar má finna á www.myrin.is og á facebook undir Mýrin barnabókmenntahátíð.