Steðji fékk framlengingu á sumrinu

„Þetta eru auðvitað bara mikil gleðitíðindi,“ segir Dagbjartur Ingvar Arilíusson, annar eigandi Brugghús Steðja, en Áfengisverslun ríkisins veitti fyrirtækinu undanþágu á dögunum til að selja sumarbjór sinn út ágústmánuð.

Vísir greindi frá því í liðinni viku að Sumarbjór Steðja yrði ófáanlegur frá 10. ágúst vegna reglugerðar sem kveður á um árstíðarbundnir áfengisdrykkir, eins og sumarbjórinn, megi einungis vera í sölu í einn til þrjá mánuði ár hvert. Drykkur Steðja kom á markað þann 10. maí og á sunnudaginn síðastliðinn voru þrír mánuðir frá því að sumarbjórinn rataði fyrst í hillur Vínbúðarinnar. Stóð til að kippa honum úr sölu eftir helgi og hefði sumrinu hjá Steðja því lokið um helgina.

Dagbjartur segir að fyrirtækið hafi í júlí sótt um undanþágu frá reglugerðinni fyrir Sumarbjór Steðja, meðal annars vegna þess að hún hafi ekki legið skýrt fyrir í maímánuði þegar sala á sumarbjórnum hófst. Eftir að undanþágubeiðninni var hafnað hafi Steðji sent ítrekun og krafið Vínbúðina svara enda um mikið hagsmunamál fyrir fyrirtækið að ræða. Brugghúsið er smátt í sniðum og hefði verið illa í stakk búið til að mæta sölustöðvun sem þessari. Alls eru á þriðja þúsund flaska af Sumarbjór Steðja til í birgðageymslum Vínbúðarinnar og hefði fyrirtækinu verið gert að farga þeim ef ekki hefði fundist farsæl lausn á málinu

Engin svör hafi þó borist frá stjórnvöldum og taldi Dagbjartur því málinu lokið.

„En tveimur dögum eftir að fréttin um sumarlokin hjá okkur fór í loftið ákvað Vínbúðin loksins að svara okkur á þá leið að við fengjum undanþágu til selja út ágústmánuð. Lögfræðingar Vínbúðarinnar sögðu að hægt væri að veita undanþáguna því að bjórinn hafi farið í sölu 10. maí en ekki fyrsta þess mánaðar en ég held að umræðan og umfjöllunin hafi skipt meira máli þegar öllu er á botninn hvolft,“ segir Dagbjartur.

Bjórinn verður því seldur fram til mánaðamóta í 22 af 48 vínbúðum landsins.