Íslenski skipaflotinn 12 árum eldri en sá norski

Íslenski skipaflotinn er að meðaltali 12 árum eldri en sá norski samkvæmt nýlegri rannsókn. Samkeppnishæfni Íslendinga er í hættu verði flotinn ekki endurnýjaður.

Íslenski skipaflotinn hefur elst hratt á síðustu árum. Lítil endurnýjun hefur átt sér stað fyrr en nú en nokkur sjávarútvegsfyrirtæki hafa tilkynnt um kaup á nýjum skipum til að leysa af hólmi skip sem eru komin til ára sinna.

Hallveig Ólafsdóttir hagfræðinemi kannaði nýlega aldur íslenska skipaflotans. Rannsókn hennar leiddi í ljós að meðalaldur skipa, 60 metra og lengri, er 26 ár á Íslandi samanborið við 14 ár í Noregi. Hallveig segir áhyggjuefni að svo mikill aldursmunur sé á skipaflota þessara þjóða en hvað skýrir þennan mun?

„Fjárfestingaumhverfið í Noregi er aðeins öðruvísi. Þeir njóta ákveðna styrkja og eru sérstaklega hvattir til að fjárfesta,“ segir Hallveig. „Hér heima hefur verið óvissa og ekki mikill stöðugleiki sem er ekki vænlegt fjárfestingaumhverfi. Svo Ísland haldi sinni samkeppnisstöðu á markaði þá er nauðsynlegt að við séum á sömu línu og okkar samkeppnislönd.“

Á pari við stóriðju

Hallveig bendir á að endurnýjun skipaflotans muni lækka olíukostnað verulega og auka öryggi sjómanna. Kolbeinn Árnason, framkvæmdastjóri LÍÚ, segir að mikil fjárfesting eigi sér nú stað í sjávarútvegi.

„Það sem þegar hefur verið tilkynnt hvað varðar flotann einan og sér þá er verið að tala um 12 ný skip. Eins er mikil fjárfesting í landvinnslu. Fjárfesting í sjávarútvegi er klárlega á pari við það sem er verið að gera í stóriðju - jafnvel miklu meira en það,“ segir Kolbeinn.

Fjárfesting er að aukast vegna meiri stöðugleika í greininni. „Menn hafa öðlast tiltrú á að umhverfið verði jákvætt og stöðugt. Þetta auðvitað bráðnauðsynlegt að endurnýja flotann sem er orðinn mjög gamall. Ég vona svo sannarlega að við sjáum ennþá fleiri tilkynningar um nýsköpun og nýsmíði í flotanum og í landi,“ segir Kolbeinn Árnason, framkvæmdastjóri LÍÚ.