Ekki ástæða til að hafa áhyggjur af verðhjöðnun

Verðbólga mælist nú 1% og hefur ekki verið lægri í 16 ár. Dósent í hagfræði segir ekki ástæður til að hafa áhyggjur af verðhjöðnun. 

Verðbólga hefur ekki verið minni frá síðasta fjórðungi ársins 1998. Að húsnæðislið undanskildum hefur verðlag raunar lækkað um 0,3% undanfarna 12 mánuði, sem er mesta lækkun vísitölunnar á þann kvarða allt frá því í október 1967.

Verðbólgan hefur nú verið undir 2,5 prósenta verðbólgumarkmiði Seðlabankans í tíu mánuði í röð, eða frá því í febrúar á þessu ári.

Verðhjöðnun er almenn lækkun verðlags, sem sagt andstæða verðbólgu. Eitt helsta stjórntæki seðlabanka, vextir, verður óvirkt í verðhjöðnun því vextir geta ekki farið undir 0 prósent. Þetta er í raun það ástand sem ríkir í mörgum ríkjum Evrópusambandsins um þessar mundir.

Ásgeir Jónsson dósent í hagfræði við Háskóla Íslands segir ekki hættu á verðhjöðnun hér á landi þótt verðbólgan sé lág. Hann segist búast við að verðbólguþrýstingur taki við sér á nýju ári eftir undirritun kjarasamninga. „Ekki til lengri tíma. Við höfum séð verðbólgu ganga niður á þessu ári sem stafar af hlutum eins og lækkandi olíuverði. Við höfum einnig séð að væntingar um lækkun vörugjalda hefur kallað fram afslætti í verslunum. Síðan er seinni hluti kjarasamninga eftir þannig að það hafa ekki miklar launahækkanir komið fram. Sé litið fram á næsta ár þá myndi ég halda við sjáum aukinn verðbólguþrýsting. Ég hef ekki áhyggjur af þessu. Kjarasamningar eru lausir eftir áramót og atvinnuleysi hefur gengið niður,“ segir Ásgeir.