Barein ekki með á HM | Ákvörðun tekin 21. nóvember

Handboltalandslið Barein hefur ákveðið að draga lið sitt úr heimsmeistarakeppninni í handbolta sem fer fram í Katar í janúar.

Eins og greint var frá fyrr í dag er ástandið við Persaflóann viðkvæmt og samskipti Katar við nágrannaríki sín ekki góð.

Alþjóðahandknattleikssambandið, IHF, tilkynnti í dag að því hafi borist tilkynning frá handknattleikssambandi Barein um að liðið myndi ekki senda lið til þátttöku á HM.

Þar kemur einnig fram að ákvörðun um framhaldið verði tekið hjá IHF-ráðinu þann 21. nóvember næstkomandi. IHF-ráðið ákvað fyrr á þessu ári að afturkalla keppnisrétt Ástralíu á mótinu og veita Þýskalandi sæti á mótinu, sem kunnugt er.

Ísland er fyrsta varaþjóð Handknattleikssambands Evrópu, EHF, fyrir HM í Katar.