Skrifaði bréf til Föroya bjór: „Ég hef sent harðorðari bréf en þetta"

„Ég hef sent harðorðari bréf en þetta,“ segir Páll Rúnar M. Kristjánsson, lögmaður hjá Málflutningsstofu Reykjavíkur sem sendi bréf í umboði Ölgerðarinnar til Föroya bjór. Mikill fréttaflutningur hefur verið um málið og sagt hefur verið frá því að í bréfinu hafi færeyska bjórframleiðandanum verið hótað lögsókn vegna bjórs sem er seldur hér á landi undir Föroyar Gull. Ölgerðin framleiðir bjór sem kallast Egils Gull.

Páll Rúnar segir að tilgangurinn með sendingu bréfsins hafi verið að óska eftir sjónarmiðum og afstöðu færeyska bjórframleiðandans á notkun vörumerkisins. „Í svona málum er mikilvægt að sýna ekki tómlæti. Að tryggja að enginn noti vörumerki í manns eigu án þess að maður segi eitthvað við því,“ útskýrir hann og tekur dæmi:

„Fyrir nokkru var lítið bakarí fyrir norðan sem framleiddi brauð sem kallaðist Heimilisbrauð. Síðan fór Myllan að framleiða brauð undir því nafni. Bakaríið gerði ekkert í því fyrr en of seint. Þá hafði bakaríið glatað rétti sínum yfir vörumerkinu. Það skiptir öllu máli að gæta réttar síns í svona málum. Það er því í raun bara lögformlegt atriði að senda svona bréf.“

Páll Rúnar segir að krafa Ölgerðarinnar sé ekki endilega að taka færeyska bjórinn af markaði. „Það má vel hugsa sér þá lausn að báðir aðilar geti verið á markaði í óbreyttri mynd. Það er samt erfitt að spá fyrir um framhaldið,“ segir hann og bendir á að málið sé í ferli. Páll hefur, í umboði Ölgerðarinnar, farið yfir svarið frá dönskum lögmanni færeyska bjórframleiðandans. „Bréfið var bara mjög gott. Við erum bara að skoða málið.“

„Með því senda þetta bréf erum við að eyða ákveðinni réttaróvissu. Þetta er lögfræðileg nauðsyn, umgjörð þessa málaflokks er þannig að maður þarf að gera þetta. Og samkeppnisumgjörð fyrir fyrirtæki er þannig að þau þurfa að gera þetta allt í gegnum löfræðinga,“ bætir hann við.

Páll segir að bréfið hafi ekki verið harðort, að mikill fjöldi svipaðra bréfa fari út á degi hverjum á milli fyrirtækja. „Í bréfinu eru engar fortakslausar kröfur, engin gífuryrði eða hótanir. Um er að ræða lýsingu á lögfræðilegri niðurstöðu og í framhaldi hennar er leitað eftir afstöðu gagnaðilans. Ef mönnum finnst bréfið harðort, þá er það vissulega leiðinlegt að heyra en þá er frekar við mig að sakast en Ölgerðina.“