Færeyski bjórrisinn svarar Ölgerðinni fullum hálsi

„Málatilbúnaður þeirra stendur á brauðfótum,“ segir Einar Waag hjá Föroya bjór í samtali við Vísi. Færeyska fyrirtækið hefur svarað bréfi Andra Þórs Guðmundssonar, forstjóra Ölgerðarinnar, þar sem málsókn er hótað á hendur Föroya bjór taki það ekki bjór sinn, Föroya gull, úr hillum ríkisins á Íslandi hið snarasta.

Forsvarsmenn Ölgerðarinnar vilja færeyska gullið úr sölu á íslenskum markaði. Bera þeir fyrir sig að Gull sé skrásett vörumerki á Íslandi frá árinu 2011.

„Bréfið var líka sent á Ívar (J. Arndal), forstjóra ÁTVR,“ segir Einar sem á þó ekki von á því að ÁTVR verði við beiðni Ölgerðarinnar. „Þá yrðum við af miklum tekjum. Þá gætum við þurft að sækja mál gegn Ölgerðinni og ÁTVR.“

Færeyskir miðlar greindu frá málinu í gær en það hefur vakið töluverða athygli þar í landi. Markaðshlutdeild Föroya bjórs er um 75 prósent í Færeyjum að sögn Einars. Þeirra helsti samkeppnisaðili sé Carlsberg en svo sé íslenskur bjór á borð við Bola og Gull.

Færeyski bruggaður níu árum lengur en sá íslenski

Einar bendir á að skrýtið sé að Ölgerðin bregðist svona við enda hafi færeyska gullið verið til sölu hér á landi í tuttugu ár. Þar með talin eru undanfarin þrjú ár síðan Gull varð skrásett vörumerki. Auk þess hafi færeyski bjórinn verið bruggaður frá árinu 1980 en Egils Gull ekki komið á markað fyrr en árið 1989. Bjórbanninu í Færeyjum lauk níu árum fyrr en á Íslandi.

„Við fögnum 125 ára afmæli fyrirtækisins í fyrra,“ segir Einar en Föroya bjór var stofnað árið 1888. Egils Gull var stofnað 1913. „Við höfum því verið á markaði aldarfjórðungi lengur.“

Hann gagnrýnir orð Einars í DV í gær þar sem forstjórinn sagðist vilja setjast niður með forráðamönnum færeyska fyrirtækisins og ræða málin.

„Okkur finnst bréf með hótun um málsókn ekki beint friðsamlegt boð á fund.“

Búnir að svara bréfinu

Lögmaður færeyska fyrirtækisins í Danmörku, sem sérhæfður er í einkarétti, hefur svarað Ölgerðinni. Einar segir að þar hafi einfaldlega verið bent á þá staðreynd að ekki eigi að vera hægt að skrásetja jafn algeng orð og gull. Þá hafi Ölgerðin aldrei tilkynnt sér að um skrásett vörumerki væri að ræða. Þá hafi bjórinn verið seldur án nokkurra athugasemda í þrjú ár á Íslandi og í tæp tuttugu ár þar á undan.

Einar segir að Andri Þór og félagar hafi verið vel meðvitaðir um tilvist færeyska bjórsins. Svo áhugasamir hafi forsvarsmenn Ölgerðarinnar verið um færeyska fyrirtækið að það kíkti í heimsókn á meðan allt lék í lyndi á Íslandi 2007.

„Andri veit allt um vörurnar okkar. Hann kíkti hingað í góðærinu og vildi kaupa fyrirtækið,“ segir Einar.

Ekki hefur náðst í Andra Þór Guðmundsson, forstjóra Ölgerðarinnar, í dag vegna málsins.