Afgangur af viðskiptajöfnuði í fimm ár

Íslenska hagkerfið hefur skilað afgangi af undirliggjandi viðskiptajöfnuði við útlönd fimm ár í röð. Í fyrra fór afgangurinn vaxandi eftir að hafa veikst nokkuð á árunum 2011 og 2012 í takti við versnandi viðskiptakjör.

Þetta kemur fram í Markaðspunkti Greiningardeildar Arion banka.

„Þetta er algjör viðsnúningur frá því sem áður var, en á árunum 2003-2008 var halli á viðskiptum við útlönd sem nam allt að 20-25% VLF árlega. Skuldasöfnun þjóðarbúsins gagnvart útlöndum hefur því verið snúið við, en samhliða því sem hagkerfið safnar afgangi af viðskiptum við útlönd batnar erlend staða þjóðarbúsins,“ segir í Markaðspunktinum.

Þá segir að þar sé ekki síst að þakka öflugum þjónustuafgangi, sem hafi vegið upp dvínandi vöruskiptaafgang og rúmlega það.

„Útflutningur þjónustu mætir ekki náttúrulegum magntakmörkunum líkt og útflutningur sjávarafurða og áls, og því er fagnaðarefni að hann skuli vera að sækja í sig veðrið, enda líklegri til þess að geta staðið undir áframhaldandi vexti til lengri tíma.“

Einnig segir að viðskiptafagangurinn sé lykilstærð þegar komi að afnámi hafta, því hann gefi skýra vísbendingu um þann gjaldeyri sem þjóðarbúið aflar til að standa skil á erlendum skuldbindingum eða bæta erlenda eignastöðu þjóðarbúsins.