Neytendasamtökin skora á Lýsi

Í kjölfar fréttar Stöðvar 2 um verðmun milli tveggja tegunda lýsisperlna hafa Neytendasamtökin skorað á Lýsi að gera grein fyrir sínum málum. Þetta kom fram í Reykjavík Síðdegis þar sem Jóhannes Gunnarsson formaður samtakanna lýsti yfir undrun sinni á verðmuninum og hvatti Lýsi til að leggja spilin á borðið.

Umfjöllun Stöðvar 2 skýrði frá því að í verslun Nettó á Granda standi neytendum til boða að kaupa hinar gömlu góðu íslensku lýsisperlur, um 100 perlur á 509 krónur eða 5 krónur stykkið. Hins vegar eru lýsisperlur með dönskum merkingum X-tra, en 100 slíkar fást á 239 krónur eða 2 krónur stykkið. Staðreyndin er sú að perlurnar eru þær nákvæmlega sömu, framleiddar af Lýsi ehf. á Íslandi.

Perlurnar sem merktar eru X-tra eru framleiddar, fluttar til Danmerkur og merktar þar. Síðan eru þær fluttar aftur til Íslands, um 4200 kílómetra langa leið. Samt eru þær meira en helmingi ódýrari.

Lýsi eigi að upplýsa um verðmuninn

„Þegar verðmunur er svona ógnarmikill eins og hann er í þessu tilviki þá finnst mér eðlilegt að Lýsi sem framleiðandi leggi spilin á borðið," sagði Jóhannes. „Ef Lýsi hefur ekkert að fela þá eiga íslenskir neytendur að fá skýringu til hlítar á þessu máli. Á meðan sú skýring kemur ekki fram munu íslenskir neytendur hafa það á tilfinningunni að verið sé að fara illa með þá, og það er ekki neinum framleiðanda til framdráttar."

Aðspurður segist Jóhannes ekki halda að undarleg verðmyndun sem slík sé einkenni á íslensku samfélagi. „Við getum fundið fleiri dæmi, á einhverjum tímapunkti borgaði sig að flytja inn íslensku lambakjöti frá Færeyjum svo ég taki sem dæmi," sagði Jóhannes. „En ég held nú að þetta sé frekar undantekning en venja. Allavega fréttum við ekki af mörgum tilvikum í þessa veru."

Jóhannes skorar á Lýsi að gera fulltrúa Neytendasamtakanna ljóst um bókhald sitt, og segir það vera í hag framleiðandans að gera skýrt fyrir sínum málum.

Viðtalið í Reykjavík síðdegis má heyra í spilaranum hér að ofan.