Engin ummerki um gos úr lofti

Vísindamenn um borð í flugvél Landhelgisgæslunnar, TF-Sif, sem flaug yfir Dyngjujökul í dag, sáu engin ummerki um að eldgos sé hafið undir jöklinum. Veðurstofan telur þó enn að lítið hraungos hafi hafist fyrr í dag og sé enn í gangi.

Bergþóra Njála Guðmundsdóttir, sem er í fjölmiðlateymi Samhæfingarmiðstöðvarinnar í Skógarhlíð, staðfesti í samtali við fréttastofu að einhverjir vísindamenn efuðust um að gos væri hafið undir jöklinum, eftir að hafa flogið þar yfir í dag. Þó er ekki búið að blása viðbúnað af né afskrifa alveg að gos sé hafið.