Kraftaverkabarn fæddist á mögnuðum degi

Kristi og Bryan Caruthers, sem búa í Asheville í Norður-Karólínu í Bandaríkjunum, eignuðust drenginn Callum klukkan 10.11 þann 13. desember sem er skrifað 12/13/14 þar vestan hafs. Talnaruna fæðingarinnar er því 10.11.12.13.14. 

En fæðingartími og -dagur er ekki það eina merkilega við þessa fæðingu því hún er kraftaverki líkust hjá Caruthers-hjónunum.

Kristi og Bryan hafa átt í miklum erfiðleikum með að geta barn og í fyrra létust tvíburadrengir þeirra sem komu í heiminn þegar Kristi var aðeins gengin 22 vikur með þá. Eftir það var þeim sagt að þau gætu örugglega ekki eignast börn.

Sem betur fer fengu þau stuttu síðar tíma hjá lækni sem gat hjálpað þeim með þeim afleiðingum að ekki leið á löngu þar til Kristi varð ólétt af Callum.