Þessar stjörnur gætu komið í afmæli Jay Z

Stjörnuhjónin Jay Z og Beyoncé dvelja nú á landinu og ætla að halda upp á 45 ára afmæli Jay Z hér en hann á afmæli á fimmtudaginn.

Það verður erfitt fyrir hjónin að toppa fertugsafmæli kappans sem haldið var í Dóminíska lýðveldinu árið 2009.

Beyoncé bauð fimmtíu af nánustu vinum Jay Z en meðal þeirra sem voru á gestalistanum voru tónlistarmaðurinn Sean „Diddy“ Combs, leikkonan Kate Hudson, íþróttamaðurinn Alex Rodriguez, rapparinn Kanye West og söngkonan Alicia Keys. Veislan var haldin á sumarleyfisstaðnum Casa de Campo og flugu Jay Z og Beyoncé öllum gestum á staðinn í tveimur einkaþotum.

Gestir máttu ekki vera með síma á sér í veislunni til að tryggja að engar myndir væru teknar. Þemað í teitinu var fimmti áratugur síðustu aldar og endaði kvöldið með glæsilegri flugeldasýningu. Gestir fengu ekkert slor að drekka heldur rándýrt Dom Pérignon- og Cristal-kampavín.

Samkvæmt heimildum Vísis ætla nánustu vinir og fjölskylda Jay Z og Beyoncé að koma hingað til lands á morgun til að fagna með afmælisbarninu. Gestalistinn gæti því verið svipaður og sá sem var í fertugsafmæli kappans. Auk þess gætu Tina Knowles, móðir Beyoncé, Solange Knowles, systir hennar og Kelly Rowland, vinkona hennar, einnig mætt í herlegheitin.