Tryggvi Þór skilur gagnrýni stjórnarandstöðunnar

Tryggi Þór Herbertsson segir að fyrst ákveðið var að ráðast í skuldaniðurfellingar líkt og ríkisstjórnin kynnti í gær þá sé leiðin sem farin var vel heppnuð. Hann segist skilja gagnrýni stjórnarandstöðunnar um förgangsröðun en bendir á að dreifingin sé mikil. Þetta kom fram þegar Tryggi Þór mætti í Í bítið á Bylgjunni í morgun.

„Þetta er búið að vera heilmikil vinna. Ég byrjaði á þessu í byrjun janúar og þetta er búið að vera mikil vinna,“ sagði Tryggi Þór um vinnuna á bak við útreikningana og framkvæmd niðurfærslurnar. „Alveg óendanlega margar flækjur. Það eru margir hnútar sem þurft hefur að skera á. Margar ákvarðanir og  gríðarlegur fjöldi af fólki sem hefur komið að því að gera þetta allt saman en núna er þessi áfangi í höfn.“

Hátekjufólkið fær brot

Tryggvi Þór sagði að aðeins örlítið brot af niðurfellingarfjárhæðinni færi til þeirra sem hann teldi hátekjufólk. „Hvað varðar tekjurnar þá eru fjölskyldur sem eru undir 16 milljónum eru að fá 75 prósent af þessu og þá er sagt að llir fyrir ofan 16 milljónr í árslaun er hátekjufólk. Það er semsagt boðskapurinn,“ sagði hann.

„Það er semsagt verið að segja að allir sem eru með meira 670 þúsund krónur í laun á mánuði sé hátekjufólk. Við sjáum að það gengur ekki upp,“ sagði Tryggi sem benti á að óumflýjanlega fái þeir sem eru með tekjur yfir tveimur milljónum líka leiðréttingu. „Auðvitað er hátekjufólk, fólk sem er með tvær milljónir á mánuði, það eru einhverjir að fá eitthvað en það er örlítið brot af þessu. Örlítið brot af þessu. Massinn er að liggja svona í kringum millitekjurnar og lágu tekjurnar.“

En hvað eru millitekjur? „Við erum að reikna með að millitekjur séu kannski að fjölskylda sé með milljón á mánuði, sirka, eitthvað svoleiðis,“ sagði hann aðspurður hvað millitekjur væru.

Skilur gagnrýnina

Í þættinum sagði Guðmundur Steingrímsson, formaður Bjartrar framtíðar, að aðgerðin væri ómarkviss og að það væri æpandi þörf á uppbyggingu í samfélaginu og að greiða niður opinberar skuldir. „Mér finnst hún ekki heldur réttlát. Það urðu allir fyrir áhrifum af hruninum þannig að þetta er ómarkviss, óréttlát, ósanngjörn og óréttlætanleg notkun á opinberu fé,“ sagði hann.

Tryggi Þór sagðist skilja hvaðan Guðmundur væri að koma. „Ég geri engar athugasemdir við þennan málflutning hjá honum Guðmundi. Ég sé alveg úr hvaða átt hann er að koma,“ sagði hann. „Nema að ég geri athugasemdir við að þetta hafi verið gert á óhagkvæman hátt. Fyrst það átti að gera þetta þá eru niðurstöðurnar með betri hætti en ég átti nokkurtíman von á.“

Tryggvi benti á að um tíu prósent fólks færi úr þeirri stöðu að vera með neikvætt eigið fé í að vera með jákvæðu eigin fé. „Það er búið að taka ákvörðun um einhverja peninga og ég er ekki að taka neina afstöðu til þess og skil alveg hvaðan þú ert að koma,“ sagði hann og bætti við: „Þeir nýtast vel innan þess ramma að það eigi að eyða þeim.“

Spurning um tilgang ríkisvaldsins

Guðmundur benti á að það væri fjáfestingaþörf víða í samfélaginu. „Það er fjárfestingaþörf hvert sem litið er,“ sagði hann og spurði: „Í þessu árferði er það verkefni ríkissjóðs að taka yfir hluta af skuldum fólks og greiða það niður? Hver á þá að gera hitt?“

Hann velti einnig upp spurningum um þá ákvörðun að hraða greiðslu skuldaniðurfærslunnar en greint var frá því í gær að óvæntur tugmilljarða afgangur af rekstri ríkissjóðs yrði nýttur til að hraða talsvert fjármögnun skuldaniðurfærslunnar. Afgangurinn skýrist að stærstum hluta af arðgreiðslum frá Landsbankanum og seðlabankanum.

„Þá finnst mér nú vera orðin aðkallandi spurning: er virkilega ekkert í huga ríkisstjórnarinnar sem er aðkallandi fjárfesting og aðkallandi uppbyggingarverkefni? Það kostar líka peninga að hafa spítalann eins og hann er. Það kostar peninga að hafa vegina eins og þeir eru. Á að velta því öllu yfir á komandi kynslóðir? Það er bara skuldaleiðréttingin sem kemst að,“ sagði hann.

Tryggi sagði hinsvegar að svigrúmið til þess að ráðast í þau verkefni koma vegna þess að hraðar er farið í að greiða niðurfærsluna. „Þetta hljómar svolítið eins og þú sért bara á móti öllu vegna þess að þú ert í stjórnarandstöðu,“ sagði hann. Því hafnaði Guðmundur.