Háskólaprófessor grunar að Renée hafi farið í lýtaaðgerð

„Ástæðan fyrir því að Renée var með öðruvísi útlit, með mjó augu og húðfellingu á efra augnloki yfir innri augnkróki, er að genablanda hennar er óvenjuleg,“ segir Edward Dutton, prófessor í finnskri menningu í Oulu-háskólanum í Finnlandi í samtali við Daily Mail. Hann grunar að leikkonan Renée Zellweger hafi farið í lýtaaðgerð en útlit hennar hefur verið mikið í umræðunni uppá síðkastið.

Þótti mörgum andlit hennar hafa tekið miklum breytingum þegar hún mætti á Elle Women in Hollywood-verðlaunin í síðustu viku og töldu margir að hún hefði látið lappa upp á það. Renée svaraði þessum vangaveltum fullum hálsi í yfirlýsingu sem hún sendi tímaritinu People og sagði svo ekki vera. Edward er hins vegar ósammála.

Edward grunar að hún hafi farið í lýtaaðgerð til að gera andlit sitt vestrænna en faðir hennar er svissneskur og móðir hennar er norsk. Uppruna sinn getur Renée rakið til minnihlutahópsins Kven í Finnlandi, Svíþjóðar og Sami-fólksins í Lapplandi. Edward ber andlit hennar einnig saman við andlit söngkonunnar Bjarkar Guðmundsdóttur og segir forfeður hennar hafa verið grænlenska.

„Mig grunar að Renée hafi farið í lýtaaðgerð til að láta útlit sitt minna minna á Sami- og Kven-fólkið og meira á hefðbundna ímynd af Norður-Evrópubúum,“ segir Edward.

„Hún var miklu fallegri og áhugaverðari þegar hún hafði hugrekki til að vera Sami og Kven,“ bætir hann við.

Hann bendir einnig á annað frægt dæmi um manneskju sem hefur breytt útliti sínu.

„Það leikur enginn vafi á að Michael Jackson fór í lýtaaðgerðir til að líta út meira eins og Evrópubúi og Renée virðist hafa gert slíkt hið sama. Svo sorglegt.“

Grínistinn Russell Brand hefur tekið upp hanskann fyrir Renée í umræðu um útlit hennar í þætti sínum The Trews og gagnrýnir umfjöllun fjölmiðla um útlit leikkonunnar.

„Það er ekki eins og sykurpúði hafi komið í stað höfuðs hennar, eða rúlluskauti eða leikfangalest.“