Kærir upptökustjórann fyrir nauðgun

Söngkonan Ke$ha, 27 ára, er búin að kæra upptökustjórann sinn Dr. Luke, 41 árs, og vonast söngkonan til að losna undan samningi við hann.

Tímaritið Us Weekly er með kæruna undir höndum en í henni heldur söngkonan því fram að Dr. Luke hafi beitt hana líkamlegu og andlegu ofbeldi síðan hún skrifaði undir samning hjá honum þegar hún var átján ára.

Ke$ha fór í meðferð gegn átröskun í janúar á þessu ári og segir að Dr. Luke hafi oft neytt hana til að drekka áfengi eða nota fíkniefni svo hann gæti fengið sínu framgengt kynferðislega.

Ke$ha segir að Dr. Luke hafi eitt sinn gefið henni pillur og að næsta dag hafi hún vaknað nakin í rúminu hans, „aum, veik og mundi ekki hvernig hún endaði þar.“ Í kjölfarið hótaði Dr. Luke henni öllu illu ef hún segði einhverjum frá nauðguninni. Hann ætlaði ekki aðeins að eyðileggja líf hennar heldur einnig fjölskykldu hennar.

Þá á Dr. Luke einnig að hafa úthúðað henni ítrekað og kallað hana feitan ísskáp sem varð til þess að Ke$ha fékk átröskun.

Dr. Luke hefur svarað ákærunni með því að kæra Ke$hu og heldur því fram að þessar frásagnir séu lygar móður hennar, Pebe Sebert. Upptökustjórinn heldur því einnig fram að söngkona hafi reynt að kúga út úr honum pening.