Brjóstaauglýsing veldur 517 árekstrum á einum degi

Auglýsing sem sett var á þrjátíu sendiferðabíla í Moskvu í Rússlandi fyrir stuttu olli gríðarlegum usla í borginni. Á auglýsingunni var mynd af konu haldandi um ber brjóst sín. Búið var að hylja geirvörturnar með blárri ræmu og á henni stóð: Þær laða að sér.

Alls er talið að auglýsingin hafi valdið 517 árekstrum á einum degi en ökumenn í borginni létu brjóstin trufla einbeitingu sína í umferðinni.

„Ég var á leiðinni á fund þegar ég sá sendiferðabíl með risastórri mynd af brjóstum á hliðinni keyra fram hjá. Síðan var keyrt aftan á mig og ökumaðurinn sagði að brjóstin hefuð truflað hann,“ segir Ildar Yuriev í samtali við Daily Star.

Það var auglýsingastofan Sarafan sem stóð fyrir herferðinni en tilgangur hennar var að hvetja fyrirtæki að setja auglýsingaherferðir á sendiferðabíla. Talsmaður stofunnar segir að forsvarsmenn hennar muni bæta allan skaða sem auglýsingin olli.