Lánið til Exista mjög óvenjulegt

Lánið sem stjórn SPRON veitti Exista sem veitt var árið 2008 er í ákæru sagt mjög óvenjulegt. Lánið hafi verið það eina sem samþykkt var á árunum 2007-2008 af stjórn sparisjóðsins á þessum tíma og að lánið hafi verið afar stórt miðað við fjárhag sparisjóðsins. Eru ákærðu sögð hafa misnotað aðstöðu sína hjá sparisjóðnum og stefnt fé bankans í verulega hættu, með því að fara út fyrir heimildir til lánveitinga. *

Lánið að fullu eða verulegu leyti glatað

Um er að ræða  tveggja milljarða lán sem tekið var á fundi stjórnar SPRON hinn 30.september 2008, sem tekið var til meðferðar að beiðni hlutafélagsins Exista. Lánið var framlengt fjórum sinnum og var síðasti gjalddagi þess 16.mars 2009. Það var ekki greitt til baka og í ákærunni segir að það verði að telja það sparisjóðnum að fullu eða að verulegu leyti glatað.

Ákærðu í málinu eru Guðmundur Örn Hauksson, fyrrverandi forstjóri SPRON og stjórnarmenn: Rannveig Rist, Jóhann Ásgeir Baldurs, Margrét Guðmundsdóttir og Ari Bergmann Einarsson.

Full ástæða til að fara varlega

Í ákærunni segir jafnframt að full ástæða hafi verið fyrir meðlimi stjórnarinnar að fara varlega við ákvörðun sína og og fara eftir öllum reglum vegna slíkra lánveitinga, ekki síst í ljósi þeirrar stöðu sem upp var komin á fjármálamörkuðum á þessum tíma. Því hafi hins vegar farið fjarri að ákærðu færu eftir þeim varrúðarreglum sem þeim bar skylda til í störfum sínum. Þvert á móti hafi lánið verið veitt án nokkurra trygginga og ekki farið fram mat á stöðu Existu og greiðslugetu. Í ljósi þess sé óhjákvæmilegt að líta svo á að brot ákærðu hafi verið stórfelld.

Sérstakur saksóknari höfðar málið og verður það þingfest í Héraðsdómi Reykjavíkur næstkomandi mánudag.