Gefa ekki upp hagnaðinn: "Þjóðhátíð er okkar einkamál“

„Tölurnar verða ekki uppgefnar. Þetta er bara fjáröflun á vegum ÍBV og var ákvörðun tekin um að gefa tölurnar ekki upp,“ segir Hörður Orri Grettisson, formaður Þjóðhátíðarnefndar.

Leynd hvílir árlega yfir hagnaði Þjóðhátíðar í Eyjum, en þúsundir leggja leið sína á þessa stærstu útihátíð landsins um hverja verslunarmannahelgi. Hátíðin var haldin í 140. skipti í ár og var ein sú fjölmennasta.

Hörður segir þó tölur um hversu margir lögðu leið sína á Þjóðhátíð ekki liggja fyrir. Þá segir hann ekki liggja fyrir hversu margir miðar voru seldir á hátíðina en fullyrðir að engir boðsmiðar hafi verið gefnir.

Þjóðhátíð er langmikilvægasti fjáröflunarliður ÍBV á hverju ári en tekjur félagsins af hátíðinni eru þó allajafna ekki gefnar upp. Í kjölfar gagnrýni stjórnarmanna á hagnaði af hátíðinni árið 2012 var upplýst að 50 milljóna króna hagnaður hefði verið af miðasölu það ár. Var ekki talin með sala á svæðinu og önnur fjáröflun tengd hátíðinni. Um þriðja mesta hagnað í sögu hátíðarinnar var að ræða.

Dóra Björk Gunnarsdóttir, framkvæmdastjóri ÍBV, segir stærstan hluta teknanna fara í íþróttastarf í Eyjum en hluti þeirra fari til Knattspyrnufélags Rangæinga, sem kemur einnig að skipulagningu hátíðarinnar.

„Það er ekki búið að gera upp Þjóðhátíð. Þetta er stór hátíð og verða gögnin kynnt  í apríl. Þetta eru ekki opinber gögn, heldur gögn innan félagsins,“ segir Dóra sem furðar sig á umfjöllun um tekjur af þessari stærstu útihátíð ársins. „Þjóðhátíð er okkar einkamál,“ segir hún. 

Öllu var tjaldað til í sumar þar sem hljómsveitin Quarashi sneri meðal annars aftur auk þess sem John Grant, Jón Jónsson, Jónas Sig, Retro Stefson, Páll Óskar, Skítamórall, Sálin hans Jóns míns og Mammút tróðu upp ásamt fleirum.