Innlent

Gísli gæti átt yfir höfði sér allt að þriggja ára fangelsi

Gísli Freyr Valdórsson hefur verið ákærður vegna meðferðar persónuupplýsinga um hælisleitenda.
Gísli Freyr Valdórsson hefur verið ákærður vegna meðferðar persónuupplýsinga um hælisleitenda. VÍSIR/STEFÁN
Ríkissaksóknari tilkynnti Gísla Freyr Valdórssyni, aðstoðarmanni innanríkisráðherra, í gær að hann verði ákærður fyrir að leka minnisblaði um hælisleitandann Tony Omos úr ráðuneytinu í fjölmiðla. Ráðherra leysti í kjölfarið Gísla frá störfum á meðan málið er til meðferðar hjá dómstólum.

Gísli sendi í kjölfarið frá sér yfirlýsingu þar sem hann lýsir yfir sakleysi sínu og segist fullviss um að hann verði sýknaður af þeim sökum sem á hann eru bornar.

Hann segir rannsókn lögreglu hafa verið ítarlega. Lögreglan hafi rannsakað farsímanotkun hans á 10 mánaða tímabili auk þess að hafa fengið afhent ýmis persónuleg gögn, svo sem fjölskyldumyndir og heimilisbókhald.

Hann segist ávallt hafa borið mikla virðingu fyrir störfum lögreglunnar í landinu og geri enn, þó hann telji að við rannsókn þessa tiltekna máls hafi lögreglan gengið fram af töluverðri hörku. Meðal annars hafi honum verið tjáð við yfirheyrslu að þetta mál "væri á oddinum" hjá lögreglu.

Lögfræðingar sem fréttastofa hefur rætt við í dag segja ljóst að Gísli verði ákærður fyrir brot á annars vegar 18. gr. laga um réttindi og skyldur starfsmanna ríkisins en þar kemur fram að hverjum starfsmanni sé skylt að gæta þagmælsku um atriði er hann fær vitneskju um í starfi sínu og leynt skulu fara samkvæmt lögum, fyrirmælum yfirmanna eða eðli málsins.

Hins vegar fyrir brot á 136. gr. almennra hegningarlaga, en þar kemur fram að opinber starfsmaður sem segir frá nokkru er leynt á að fara og hann hefur fengið vitneskju um í starfi sínu eða varðar embætti hans eða sýslan, skuli sæta fangelsi allt að einu ári.

Hafi hann gert það til þess að afla sér eða öðrum óréttmæts ávinnings, eða noti hann slíka vitneskju í því skyni, megi beita fangelsi allt að 3 árum.

Ekki náðist í Gísla Frey við vinnslu fréttarinnar.


Tengdar fréttir

Lekamálið snýst um okkur

Lekamálið snýst ekki um að undarlegt sé að sumir hælisleitendur séu með fölsuð skilríki eins og skilja má á Brynjari Níelssyni.

Tólf frá sjö löndum grófu upp Skugga

Tólf manna hópur fornleifafræðinga frá sjö löndum hefur grafið upp torfhúsið Skugga í Hörgárdal. Rannsóknin er samstarf City University of New York og Fornleifastofnunar Íslands. Býlið er mjög ofarlega í dalnum sem þykir koma á óvart.

Fagnar því að hreyfing komist á málið

Lögfræðingur hælisleitandans sem aðstoðarmaður innanríkisráðherra á að hafa brotið gegn segir lengi hafa verið beðið eftir ákvörðun ríkissaksóknara.

Yfirlýsing frá Gísla Frey: Segist fullviss um að verða sýknaður

"Svo virðist sem grundvallarafstaða ákæruvaldsins, sem felst í því að ekki sé gefin út ákæra nema yfirgnæfandi líkur séu á sakfellingu, sé að engu höfð,“ segir aðstoðarmaður innanríkisráðherra sem nú hefur verið vikið frá störfum.




Fleiri fréttir

Sjá meira


×