Facebook-hrekkur um Herjólfsferð vekur athygli

Tæplega tvö þúsund manns hafa smellt á „like-takkann“ við Facebook-hrekk vinkvenna inni í hópnum Þjóðhátíð í Eyjum 2014.

Þar skrifaði Maríanna Eva Abelsdóttir að vinkona hennar, Eva Líf Sigurjónsdóttir, hefði sofnað í Herjólfi og verið sjö klukkustundir um borð.

Hún sagði Evu hafa farið fjórar ferðir með Herjólfi. Eva Líf segir frá því í samtali við Vísi að mikill fjöldi hafi sent henni skilaboð og vinabeiðnir í kjölfar hrekksins.

„Ég er búin að fá ótal vinabeiðnir og fólk hefur sent mér skilaboð þar sem það lýsir yfir ánægju sinni með þessa sögu," segir Eva í samtali við Vísi.

Maríanna Eva, vinkona Evu, átti hugmyndina að hrekknum. Hún segist hafa fengið hugmyndina þegar hún þurfti að vekja Evu í Landeyjahöfn. Maríanna telur að Eva hefði vel getað sofið lengur. „Mér datt í hug að þetta væri eitthvað sem gæti komið fyrir Evu," segir Maríanna og staðfestir Eva það einnig. „Já, þetta er ekki ólíkt mér, þetta er algjörlega eitthvað sem ég gæti lent í. Maríanna er auðvitað algjör húmoristi," bætir hún við.

Vinkonurnar hafa nú fylgst með þessum mikla fjölda sem hefur líkað við færsluna. „Viðbrögðin eru ótrúleg. Það eru allir að „læka“ þetta," segir Maríanna.