"Ég þarf að beygja inn í götu og kjökra í smá stund“

Tónlistarmaðurinn Bob Geldof veitti sitt fyrsta sjónvarpsviðtal í vikunni á ITV síðan dóttir hans, Peaches Geldof, lést.

Peaches fannst meðvitundarlaus á heimili sínu í Kent þann 7. apríl síðastliðinn og var úrskurðuð látin.

„Maður hefur ekki um margt að velja. Þetta er óbærilegt. Þetta er mjög erfitt, allir sem hafa lent í þessu gera sér grein fyrir því. Hvað getur maður annað gert? Maður tekst á við þetta,“ segir Bob í viðtali við sjónvarpskonuna Lorraine Kelly. Hann segist takast á við sorgina með tónlist en hann spilaði með hljómsveitinni The Boomtown Rats þann 26. maí, tæpum tveimur mánuðum eftir að Peaches lést.

„Að vera á sviði er hreinsandi. Það hreinsar hugann. Þegar ég stíg niður af sviðinu er ég líkamlega þreyttur en andlega skýr. Ef ég dvel við orðin finnst mér stundum erfitt að komast í gegnum heilt lag því þau taka á sig aðra meiningu en þegar ég skrifaði þau.“

Fyrsta eiginkona Bobs og móðir Peaches, Paula Yates, lést úr of stórum skammti af heróíni árið 2000. Mánuði eftir að Peaches lést bað Bob kærustu sinnar Jeanne Marine.

„Ég ætlaði að gera það hvort sem er á afmælisdaginn hennar – ég elska hana í ræmur og hún er ótrúleg og ég hefði klárlega ekki komist í gegnum síðustu tuttugu árin án hennar,“ segir Bob um bónorðið. Hann bætir við að hafa íhugað að fresta því.

„Síðan hugsaði ég nei, við þurfum að hleypa lofti inní herbergið, við þurfum að hleypa smá birtu inn.“

Hann segir að sorg yfir dauða Peaches hellist stundum yfir hann.

„Ég gæti verið að tala við einhvern eða ganga niður götu, og ég þarf að passa mig því ég er enn viðkvæmur. Ég er að ganga niður götu og stundum, án viðvörunar, finn ég fyrir henni og ég brotna niður og ég verð að vera passasamur því það eru ljósmyndarar alls staðar á King‘s Road. Ég þarf að beygja inn í götu og kjökra í smá stund,“ segir Bob.

Líklegt er að fíkniefnaneysla hafi dregið Peaches til dauða, líkt og móður hennar. Hún skildi eftir sig eiginmann, tónlistarmanninn Thomas Cohen, og tvo syni, Astala, tveggja ára og Phaedra, eins árs.