Peningarnir ekki notaðir til að kaupa nýja leikmenn

Alfreð Finnbogason er sterklega orðaður við Real Sociedad þessa dagana en uppeldisfélög hans myndu njóta góðs af sölunni.

Alfreð hefur slegið í gegn með hollenska liðinu Heerenveen síðustu tvö tímabil en hann skoraði 29 mörk í úrvalsdeildinni á nýliðnu tímabili og varð markahæstur.

Hann hefur lengi verið orðaður við hin ýmsu félög víða í Evrópu en síðustu daga hafa hollenskir og spænskir fjölmiðlar greint frá því að Real Sociedad hafi átt í viðræðum við Heerenveen um kaupverð.

Real Sociedad er sagt reiðubúið að borga rúman 1,1 milljarð nú og um 400 milljónir króna til viðbótar ef Alfreð uppfyllir ákveðin skilyrði á samningstímanum tengd frammistöðu hans.

Samkvæmt þessu fengi Breiðablik um 35 milljónir í sinn hlut í uppeldisbætur en Fjölnir og belgíska liðið Lokeren um ellefu milljónir hvort.

Rætt var við Borghildi Sigurðardóttur, formann knattspyrnudeildar Breiðabliks, í kvöldfréttum Stöðvar 2 þar sem fram kom að verði af sölunni muni deildin nota upphæðina til að styrkja innviði félagsins. Hún tók fyrir að upphæðin yrði eyrnamerkt fyrir leikmannakaup í meistaraflokki karla.